ކުޅިވަރު
އަމަދު ޑިއާލޯ އަނެއްކާ ވެސް ލިވަޕޫލް ކޮޅަށް މުހިންމު ގޯލެއް ކާމިޔާބުކޮށްފި

މެޗުގެ ނަތީޖާ ހަމަހަމަކުރި ގޯލު ޖެހުމަށްފަހު އަމަދު ޑިއާލޯ އުފާފާޅުކުރަނީ، ފޮޓޯ: ޕްރިމިއަރ ލީގު
ހުލާސާ
މެޗުން އެއްވަރުވި ނަމަވެސް، ލީގުގެ އެއްވަނައިގައި ލިވަޕޫލަށް 6 ޕޮއިންޓުގެ ލީޑެއް އެބައޮތް.
މި ޕޮއިންޓާއެކު ޔުނައިޓެޑު ވަނީ ލީގުގެ 13 ވަނައަށް ކުރިއަށް ޖެހިލާފައި.
މިދިޔަ ސީޒަންގެ އެފްއޭ ކަޕް ކުއާޓާ ފައިނަލުން ލިވަޕޫލް ކަޓުވާލި ގޯލު ކާމިޔާބުކުރި މެންޗެސްޓަރ ޔުނައިޓެޑުގެ ފޯވާޑް، އަމަދު ޑިއާލޯ އަނެއްކާވެސް ލިވަޕޫލަށް ހިތްދަތިކަން ގެނުވައިފިއެވެ.
އިންގްލިޝް ޕްރިމިއަރ ލީގުގައި އާދީއްތަ ދުވަހުގެރޭ ލިވަޕޫލްއާއި މެންޗެސްޓަރ ޔުނައިޓެޑް ބައްދަލުކުރި މެޗު 2-1 އިން ލިވަޕޫލުން ލީޑު ކުރަމުން ދަނިކޮށް، މެޗު ނިމެން 10 މިނެޓަށް ވެފައި އޮއްވައި އަމަދު ވަނީ ޔުނައިޓެޑަށް ނަތީޖާ ހަމަހަމަކޮށްދީ، ލީގުގެ އެއްވަނައިގައި އޮތް ލީޑު ފުޅާ ކުރުމަށް ލިވަޕޫލުން ކުރި މަސައްކަތަށް ހުރަސް އަޅާފައެވެ. މި މެޗު ނިމުނީ 2-2 އިން ދެ ޓީމު އެއްވަރުވެގެނެވެ.
އަނެއްކޮޅުން، ޔުނައިޓެޑުގެ އައު ކޯޗު، ރޫބެން އަމޮރިމްގެ އިރުޝާދުގެ ދަށުން މިއީ އެ ޓީމު އެންމެ މޮޅަށް ކުޅުނު މެޗެވެ.
1979 ވަނަ އަހަރުގެ ފަހުން ޖެހިޖެހިގެން ހަތަރު މެޗުން ބަލިނުވެ ސަލާމަތްވުމުގެ އަޒުމުގައި ނިކުތް ޔުނައިޓެޑުން މެޗުގެ ލީޑު ނެގީ ދެވަނަ ހާފުގެ 7 ވަނަ މިނެޓުގައި ލިސާންޑްރޯ މާޓިނޭޒް ކާމިޔާބުކުރި ގޯލަކުންނެވެ. ވާތް ފަޅީގައި ހުރެފައި ގޯލުގެ މަތީ ދާގަނޑަށް ފޮނުވާލި މި ބޯޅަ، ލިވަޕޫލްގެ ގޯލްކީޕަރ އަލިސަން ބެކާރއަށް މަތަ ނުކުރެވުނީ އެ ބޯޅަ ފޮނުވާލިލެއް ބާރުކަމުންނެވެ.
ޔުނައިޓެޑުން ގޯލު ކާމިޔާބު ކުރިތާ 7 މިނެޓު ފަހުން، މެޗުގެ 59 ވަނަ މިނެޓުގައި ލިވަޕޫލުން މެޗުގެ ނަތީޖާ ހަމަހަމަ ކުރިއެވެ. ކޯޑީ ގަކްޕޯގެ މޮޅު ހުނަރު ފެނިގެން ދިޔަ މި ގޯލު އޭނާ ކާމިޔާބު ކުރީ، ވާތް ފަރާތުން ޑިފެންޑަރެއް ނައްޓާލުމަށްފަހު ކަނާތު ފައިން ދުރުކަނަށް ބޯޅަ ފޮނުވާލައިގެންނެވެ.
ލިވަޕޫލުން މެޗުގައި ލީޑު ނެގީ، ޔުނައިޓެޑުގެ ޑިފެންޑަރ، މަތިޖްސް ޑިލިޓްގެ އަތުގައި ޕެނަލްޓީ އޭރިއާގެ ތެރެއިން ބޯޅަ ޖެހުމުން ލިބުނު ޕެނަލްޓީއަކުން، އެ ޓީމުގެ ތަރި މުޙައްމަދު ސަލާޙްއެވެ. މި ގޯލާއެކު ސަލާހްވަނީ ލީގުގެ ރަން ބޫޓުގެ ރޭހުގައި ދެ ގޯލުގެ ލީޑެއް ނަގާފައެވެ.
މެޗުގެ ނަތީޖާ ބަދަލު ކުރުމަށް ބުރަކޮށް މަސައްކަތް ކުރަމުން ދިޔަ ޔުނައިޓެޑަށް ކޮންމެވެސް ވަރެއްގެ ހިތްހަމަޖެހުމެއް ލިބުނީ، ބަދަލު ކުޅުންތެރިއެއްގެ ގޮތުގައި ކުޅެން ނިކުން އަލެހާންޑްރޯ ގަނާޗޯ 80 ވަނަ މިނެޓުގައި ދިން ޕާހަކުން، އަމަދް ޑިއާލޯ ކާމިޔާބުކުރި ގޯލުންނެވެ.
މި މެޗުން އެއްވަރުވި ނަމަވެސް، ލީގުގެ އެއްވަނައިގައި ލިވަޕޫލަށް 6 ޕޮއިންޓުގެ ލީޑެއް އެބައޮތެވެ. އަދި މި ޕޮއިންޓާއެކު ޔުނައިޓެޑު ވަނީ ލީގުގެ 13 ވަނައަށް ކުރިއަށް ޖެހިލާފައެވެ.