ޓޯކިޔޯގެ ސުޝީ ރެސްޓޯރަންޓަކުން 1.3 މިލިއަން ޑޮލަރަށް ބޮޑުކަންނެއްޔެއް ގަނެފި

ޖަޕާނުގެ ވެރިރަށް ޓޯކިޔޯގައި އޮންނަ ޓޯޔޯސު މަސްމާރުކޭޓުގެ އަހަރީ އޮކްޝަނުގައި ސުޝީ ރެސްޓޯރަންޓެއް ކަމަށްވާ އޮނޮދެރާ ގްރޫޕުން 207 މިލިއަން ޔެން (1.3 މިލިއަން ޑޮލަރު) އަށް"ބްލޫފިން ޓޫނާ" ބޮޑުކަންނެއެއް ގަނެފިއެވެ. މި އަގަކީ މި އޮކްޝަނުގައި މިހާތަނަށް ދެއްކި ދެވަނައަށް އެންމެ ބޮޑު އަގެވެ.

276 ކިލޯގްރާމުގެ (608 ޕައުންޑު) ބަރުދަން ހުރި މި މަހަކީ މޮޓޯސައިކަލެއްގެ ސައިޒާއި ބަރުދަނާ އެއްވަރުގެ މަހެކެވެ. އޮނޮދެރާ ގްރޫޕުގެ އޮފިޝަލެއް ކަމަށްވާ ޝިންޖީ ނަގާއޯ ވިދާޅުވި ގޮތުގައި މި މަސް ބޭނުންކުރާނީ އެ ގްރޫޕުގެ މިޝެލިން-ސްޓާ ލިބިފައިވާ ގިންޒާ އޮނޮދެރާ ރެސްޓޯރަންޓުތަކާއި ޖަޕާނުގެ އެކި ކަންކޮޅުތަކުގައި ހުރި ނަދަމަން ރެސްޓޯރަންޓުތަކުގައެވެ.

"އަހަރުގެ ފުރަތަމަ ޓޫނާއަކީ ރަނގަޅު ނަސީބު ގެނެސްދޭ އެއްޗެއް،" ނަގާއޯ ވިދާޅުވިއެވެ. އޭނާ އިތުރަށް ވިދާޅުވީ މީހުން މި މަސް ކައިގެން "އުފާވެރި އަހަރެއް" ހޭދަކުރާނެ ކަމަށް އުންމީދުކުރައްވާ ކަމަށެވެ. މި މަހަކީ ޖަޕާނުގެ އުތުރުގައިވާ އައޮމޮރީ ސަރަޙައްދުން ބޭނި މަހެކެވެ.

އޮނޮދެރާ ގްރޫޕުން ވަނީ ފަސް އަހަރު ވަންދެން މި އޮކްޝަނުގައި އެންމެ މަތީ އަގު ދައްކާފައެވެ. މިދިޔަ އަހަރު އެންމެ މަތީ އަގުގެ ޓޫނާއަށް އެ ގްރޫޕުން ދެއްކީ 114 މިލިއަން ޔެނެވެ. 1999 އިން ފެށިގެން މިހާތަނަށް އެންމެ މަތީ އަގު ދެއްކީ 2019 ގައި 278 ކިލޯގްރާމުގެ ބްލޫފިން ޓޫނާއަކަށް 333.6 މިލިއަން ޔެނެވެ.

ޓޯޔޯސު މަސްމާރުކޭޓަކީ 1935 ގައި ހުޅުވުނު، ދުނިޔޭގެ އެންމެ ބޮޑު މަސްމާރުކޭޓު ކަމަށް ބުނެވޭ ތަނެކެވެ. މި މާރުކޭޓު މަޝްހޫރުވެފައިވަނީ ކޮންމެ ދުވަހަކު ފަތިހު ބާއްވާ ޓޫނާ އޮކްޝަނަށެވެ. މި އަހަރުގެ އޮކްޝަނުގައި ހޮކައިދޯ ސީ އަރޗިންއަކަށް ވެސް ވަނީ ރެކޯޑު އަގެއް ކަމަށްވާ 7 މިލިއަން ޔެން ދައްކާފައެވެ.