ޚަބަރު
ފުލުހުންގެ ބެލުމުގެ ދަށުގައި ހުއްޓާ މަރުވި އަޠުހަރުގެ މައްސަލައިގައި ދެ ފުލުހަކާ މެދު ދަޢުވާކުރަން ފޮނުވައިފި

ށ. މިލަންދޫ، ހެޕީލޭންޑް، އާދަމް އަޠުހަރު ފޮޓޯ:އިންޓަނެޓް
މާލޭގައި އަންހެނަކު ރަހީނުކުރި މައްސަލައާ ގުޅިގެން ފުލުހުންގެ ބެލުމުގެ ދަށުގައި ހުއްޓާ މަރުވި ށ. މިލަންދޫ، ހެޕީލޭންޑް، އާދަމް އަޠުހަރުގެ މަރުގެ މައްސަލާގައި ދެ ފުލުހަކާ މެދު ދަޢުވާކޮށްދިނުމަށް އެދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ޕްރޮސެކިއުޓަރ ޖެނެރަލްގެ އޮފީހަށް ވަނީ ފޮނުވާފައެވެ.
މިދިޔަ އަހަރުގެ އޯގަސްޓު މަހުގެ 29 ވަނަ ދުވަހު މާލޭގައި އަންހެނަކު ރަހީނުކުރި މައްސަލާގައި އަޠުހަރު ފުލުހުންގެ ބެލުމުގެ ދަށަށް ގެންދިޔުމަށްފަހު، ސެޕްޓެމްބަރު މަހުގެ 2 ވަނަ ދުވަހު އޭނާ މަރުވިއެވެ. މި މައްސަލަ އެވަގުތުން ފެށިގެން ކަމާބެހޭ އިދާރާތަކުން ތަޙުޤީޤުކުރަން ފެށިއެވެ.
އެޗްއާރްސީއެމްއިން މި މައްސަލަ ތަޙުޤީޤުކޮށް ނިންމުމަށްފަހު، ދެ ފުލުހެއްގެ މައްޗަށް ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާކަން އެ ކޮމިޝަނުން ވަނީ ކަށަވަރުކޮށްދީފައެވެ. ނަމަވެސް މި މައްސަލައިގެ އިތުރު ތަފްސީލެއް އެޗްއާރްސީއެމްއިން ހާމަކޮށްފައެއް ނުވެއެވެ.
އެޗްއާރްސީއެމްއިން މި މައްސަލަ ތަޙުޤީޤުކުރަން ފެށުމާ ގުޅިގެން ނެރުނު ބަޔާނުގައި ބުނެފައިވަނީ، އަޠުހަރު ފުލުހުންގެ ބެލުމުގެ ދަށަށް ގެނައުމުގައި ބާރުގެ ބޭނުންކޮށްފައިވާ ގޮތާއި، އޭނާއަށް ލިބުނު އަނިޔާތަކަށް ފަރުވާދިނުމުގައި ފުލުހުން ޢަމަލުކުރި ގޮތުގެ އިތުރުން، އޭގެ ފަހުން އޭނާއަށް ސިއްޙީ ފަރުވާ ފޯރުކޮށްދިނުމުގައި ޢަމަލުކޮށްފައިވާ ގޮތް ބަލާނެ ކަމަށެވެ.
މި މައްސަލައިގައި ފުލުހުން ފުރިހަމަ އެއްބާރުލުން ދޭނެ ކަމަށް ބުނެފައިވާއިރު، އަޠުހަރު މަރުވި ސަބަބު ދެނެގަތުމަށް ޕޯސްޓްމޯޓަމްވެސް ވަނީ ހަދާފައެވެ. މި މައްސަލައިގެ ތަޙުޤީޤު ކުރިއަށްދާ ގޮތާއި، ޕްރޮސެކިއުޓަރ ޖެނެރަލްގެ އޮފީހުން ނިންމާ ގޮތަކަށް ގިނަ ބައެއްގެ ސަމާލުކަން ހުރިކަން ފާހަގަކުރެވެއެވެ.