ޔޫރަޕަށް ދަތުރުކުރާ މޯލްޑިވިއަންގެ އައު ވައިޑްބޮޑީ މަތިންދާބޯޓު މިއަދު ދައްކާލަނީ

ގައުމީ އެއާލައިން މޯލްޑިވިއަންގެ އާ ވައިޑްބޮޑީ މަތިންދާބޯޓު ދައްކާލުމަށް މިއަދު ހަވީރު މާލޭގައި ޚާއްޞަ އެއާޝޯއެއް ބޭއްވުމަށް ވަނީ ނިންމާފައެވެ.

މޯލްޑިވިއަންއިން މިއަދު ރާއްޖެއަށް ގެންނަ އެއާބަސް އޭ-330 އެއާކްރާފްޓް ދައްކާލުމަށް މި އެއާޝޯ ބާއްވާނީ މިއަދު ހަވީރު 17:00 އިން 17:30 އަށް މާލޭގެ އުސްފަސްގަނޑާއި ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވަހީގެ އިރުމަތީ ފަރާތު އަތިރިމަތީގައެވެ. މި މަތިންދާބޯޓު ރާއްޖެއަށް އަންނަނީ ސިންގަޕޫރުންނެވެ.

މި އާ ވައިޑްބޮޑީ އެއާކްރާފްޓަކީ އެއްފަހަރާ 264 ފަސިންޖަރުންނަށް ދަތުރުކުރެވޭނެ ބޯޓެކެވެ. މި އެއާކްރާފްޓްތަކުން ދުރު މަންޒިލްތަކަށް ސީދާ ދަތުރު ކުރެވޭނެކަމަށް މޯލްޑިވިއަންއިން ވަނީ ފާހަގަކޮށްފައެވެ. އަދި ވައިޑް ބޮޑީ އެއާކްރާފްޓުގެ އިތުރު އެއާކްރާފްޓެއް ވެސް ގެންނަން ނިންމާފައިވާ ކަމަށް މޯލްޑިވިއަންއިން ބުނެފައިވެއެވެ.

މި އަހަރު ތެރޭގައި ޗައިނާއާއި ޔޫރަޕްގެ މަންޒިލުތަކަށް މޯލްޑިވިއަންގެ ވައިޑް ބޮޑީ އެއާކްރާފްޓުގެ ދަތުރުތައް ފަށަން ވަނީ ނިންމައިފައެވެ. އާ ބޯޓުތަކާ އެކު އިތުރު ހަތް މަންޒިލަކަށް ދަތުރުތައް ފަށަން މޯލްޑިވިއަންއިން ވަނީ ނިންމައިފައެވެ. އޭގެ ތެރޭގައި ޗައިނާގެ ތިން ސިޓީއަކާއި ސައުތު އެފްރިކާގެ ޖޮހޭނަސްބާގާއި ޔޫރަޕްގެ ތިން ސިޓީއެއް ހިމެނެއެވެ.

މި ވަގުތު މޯލްޑިވިއަންގެ ފްލީޓުގައި 13 ބޯޓު އެބައޮތެވެ. އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓު ހިމެނޭ ކަމަށާއި ބާކީ ހުރީ ޑޭޝް މަރުކާގެ ބޯޓުތައް ކަމަށް އެ އެއާލައިނުން ވަނީ ބުނެފައެވެ. މޯލްޑިވިއަނުން މި ވަގުތު ދަތުރުކުރަނީ ރާއްޖޭގެ 16 މަންޒިލަކާއި އިންޑިއާގެ ތިން ސަރަހައްދަކާއި ލަންކާ އަދި ބަންގްލަދޭޝަށެވެ.