ވައި ނުސާފުވުމުން ސިއްހީ މައްސަލަތައް ކުރިމަތިވެދާނެތީ ސަމާލުވުމަށް އިލްތިމާސްކޮށްފި

ރާއްޖޭގެ ސަރަހައްދުގައި ވައިގެ ނުސާފުކަން އިތުރުވެ، ހަމަލޮލަށް ދުރު ފެންނަ މިންވަރު ދަށްވެފައިވާތީ، މިކަމުން ކުރިމަތިވެދާނެ ސިއްހީ މައްސަލަތަކަށް ސަމާލުވުމަށް ކަމާބެހޭ ފަރާތްތަކުން އިލްތިމާސްކޮށްފިއެވެ.

މޫސުމާބެހޭ ޤައުމީ އިދާރާއިން ވިދާޅުވީ، ރާއްޖޭގެ ޖައްވު މިހާރު ނުސާފުވެފައިވަނީ އިންޑިއަން ސަބް ކޮންޓިނެންޓް ސަރަހައްދުން އަންނަ ދުމުގެ ސަބަބުން ކަމަށެވެ. މިއީ އާންމުކޮށް އިރުވައި މޫސުން ފެށޭ ދުވަސްވަރާ ދިމާކޮށް ކުރިމަތިވާ ހާދިސާއެއް ކަމަށްވެސް އެ އިދާރާއިން ފާހަގަކުރެއްވިއެވެ.

އުތުރުގެ އަތޮޅުތަކުގައި ހަމަލޮލަށް ދުރުމިން ފެންނަ މިންވަރު މިހާރު ވަނީ 3 ކިލޯމީޓަރަށް ދަށްވެފައެވެ. އަދި މާދަމާއިން ފެށިގެން މާލެ ހިމެނޭގޮތަށް މެދުރާއްޖެތެރެއަށްވެސް މި މިންވަރަށް ވައި ނުސާފުވެދާނެ ކަމަށް ލަފާކުރެވޭ ކަމަށް މޫސުމާބެހޭ ޤައުމީ އިދާރާއިން ވިދާޅުވިއެވެ. ނަމަވެސް، ދެކުނުގެ އަތޮޅުތަކަށް މި މައްސަލަ ކުރިމަތިވާނެ ކަމަށް ނުބެލެވޭ ކަމަށްވެސް އެ އިދާރާއިން ފާހަގަކުރެއްވިއެވެ.

ވައި ނުސާފުވުމުގެ ސަބަބުން ކުރިމަތިވެދާނެ ސިއްހީ މައްސަލަތަކަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިލްތިމާސްކޮށްފައެވެ. ފުއްޕާމޭގެ ބަލިތަކާއި، ހިތުގެ ބައްޔާއި، އެލަރޖީގެ މައްސަލަ ހުންނަ މީހުން ގެއިން ބޭރުގައި ގިނަ ވަގުތު ހޭދަނުކުރުމަށް އެޗްޕީއޭ އިން އެދިވަޑައިގެންފައިވެއެވެ. އަދި ބޭރަށް ނުކުންނަން ޖެހޭ ހާލަތްތަކުގައި މާސްކު އެޅުމަށާއި، ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ގެއިން ބޭރުގައި ގިނަ ވަގުތު ހޭދަނުކުރުމަށްވެސް އިލްތިމާސްކޮށްފައިވެއެވެ.

މިއީ އާންމުކޮށް އިރުވައި މޫސުން ފެށޭ ދުވަސްވަރާ ދިމާކޮށް ދިމާވާ ކަމެއްކަން ފާހަގަކުރެވެއެވެ. މިދިޔަ އަހަރުގެ ޖެނުއަރީ މަހުގެ ތެރޭގައިވެސް ވައި ނުސާފުވެ، ހަމަލޮލަށް ފެންނަ ދުރުމިން 5 ކިލޯމީޓަރަށް ދަށްވެފައިވާކަން ފާހަގަކުރެވެއެވެ. މޫސުމާބެހޭ ޤައުމީ އިދާރާއިން ވިދާޅުވީ، އާންމު މިންގަނޑަށް ވައި ސާފުވާނެ ކަމަށް ބެލެވެނީ މާރިޗު މަހު ކަމަށާއި، ނަމަވެސް ދުވަހަކަށްވުރެ ދުވަހެއް ވައި ސާފުވަމުންދާނެ ކަމަށެވެ.

Air quality in the northern regions has deteriorated due to haze, reducing horizontal visibility to 3 kilometers. Central atolls are expected to experience similar conditions in the coming days. pic.twitter.com/L9KjN48LAi

— Maldives Meteorology (@MetMaldives) January 6, 2025