ދުނިޔެ
ޗައިނާގައި ފެތުރެމުންދާ އެޗްއެމްޕީވީ ވައިރަސް އިންޑިއާއިން ފެނިއްޖެ

ހޮސްޕިޓަލުގައި ފަރުވާ ދިނުން ކުރިއަށް ދަނީ ފޮޓޯ:އިންޓަނެޓް
ޗައިނާގައި އެޗްއެމްޕީވީ ވައިރަސް ފެތުރެމުންދާ ދަނޑިވަޅެއްގައި، އިންޑިއާގެ ބެންގަލޫރުގައި މި ވައިރަހުގެ ތިން ކޭސް ފެނިއްޖެއެވެ. އިންޑިއާގައި އެޗްއެމްޕީވީގެ ފުރަތަމަ ކޭސްތަކުގެ ގޮތުގައި ރިޕޯޓު ކުރެވިފައިވަނީ 8 މަސް ދުވަހުގެ ކުއްޖަކާއި 3 މަސް ދުވަހުގެ ކުއްޖެކެވެ. 8 މަސް ދުވަހުގެ ކުއްޖާ މިހާރު ދަނީ ހޮސްޕިޓަލުގައި ފަރުވާ ހޯދަމުންނެވެ. އަދި 3 މަސް ދުވަހުގެ ކުއްޖާ ވަނީ ހޮސްޕިޓަލުން ޑިސްޗާޖް ކުރެވިފައެވެ. ފަހުން އަހްމަދާބާދުގައި 2 މަސް ދުވަހުގެ ކުއްޖަކަށްވެސް މި ވައިރަސް ޖެހިފައިވާކަން ޓެސްޓުން ދައްކާފައިވެއެވެ.
މިވަގުތު ޗައިނާގައި އެޗްއެމްޕީވީ ވައިރަސްގެ ފެތުރުމެއް ފެންނަމުންދާކަމަށް ރިޕޯޓުތަކުން ދައްކައެވެ. ސޯޝަލް މީޑިއާގެ ޕޯސްޓުތަކުން ދައްކާގޮތުގައި އިންފްލުއެންޒާ އޭ، އެޗްއެމްޕީވީ، މައިކޯޕްލާޒްމާ ނިއުމޯނިއާ އަދި ކޮވިޑް-19 ފަދަ ގިނަ ވައިރަސްތަކެއް ޗައިނާގައި ފެތުރެމުންދެއެވެ. ސޯޝަލް މީޑިއާގައި ޝާއިޢުކުރެވިފައިވާ ވީޑިއޯތަކާއި ޕޯސްޓުތަކުން ދައްކާގޮތުގައި ނޭވާލުމުގެ ބަލިތަކަށް ފަރުވާ ހޯދާ މީހުންގެ ސަބަބުން ހޮސްޕިޓަލްތައް ވަނީ ތޮއްޖެހިފައެވެ.
2001 ވަނަ އަހަރު ފުރަތަމަ ފާހަގަކުރެވުނު އެޗްއެމްޕީވީ އަކީ ނޭވާލުމުގެ ނިޒާމަށް އަސަރުކުރާ އިންފެކްޝަނެކެވެ. މި ވައިރަހުގެ ސަބަބުން ފްލޫ ޖެހުނު ފަދަ އަލާމާތްތަކެއް ފެނެއެވެ. މި ބަލި ކޮންމެ އުމުރެއްގެ މީހުންނަށްވެސް ޖެހިދާނެއެވެ. ނަމަވެސް 5 އަހަރުން ދަށުގެ ކުޑަކުދިންނާއި، ދުވަސްވީ މީހުންނާއި، ދިފާޢީ ނިޒާމު ބަލިކަށި މީހުންނަށް މި ބަލި ޖެހުމުގެ ފުރުސަތު ބޮޑެވެ.
އެޗްއެމްޕީވީގެ އަލާމާތްތަކުގެ ތެރޭގައި ކެއްސުމާއި، ހުންއައުމާއި، ނޭފަތް ބެދުމާއި، ނޭވާލަން އުނދަގޫވުމާއި އަދި ކަރުގައި ރިއްސުން ހިމެނެއެވެ. މި އަލާމާތްތައް އާންމުކޮށް ފެންނަނީ ވައިރަހަށް ހާމަވާތާ 3 އިން 6 ދުވަހުގެ ތެރޭގައެވެ. އެޗްއެމްޕީވީގެ ސަބަބުން ހާލު ދެރަވެއްޖެނަމަ ހޮސްޕިޓަލްގައި އެނދުމަތިކުރަން ޖެހެއެވެ.
އެޗްއެމްޕީވީ ފެތުރެނީ ބަލި ޖެހިފައިވާ މީހަކާ ސީދާ ގުޅުން ބޭއްވުމުންނެވެ. ވައިރަސް އެކުލެވޭ ތަންތަނުގައި އަތްލުމާއި، ކެއްސުމާއި، ކިނބިހި އެޅުމާއި އަދި އަތް ގުޅުވާލުމުން މި ވައިރަސް އެހެން މީހުންނަށް ފެތުރިދާނެއެވެ.