އެއަރޕޯޓުގައި އެކްސިޑެންޓްވި ޓެކްސީ ޑްރައިވަރަށް ކުރިމަތިވީ ސިއްޙީ ކުއްލި ހާލަތެއް :އެމްއޭސީއެލް

ވެލާނާ އިންޓަރނޭޝަނަލް އެއަރޕޯޓުގައި މިއަދު ހެނދުނު 9:40 އެހާކަށްހާއިރު ޓެކްސީއަކާއި ޕިކަޕެއް ޖެހި އެކްސިޑެންޓެއް ހިނގައިފިއެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މަޢުލޫމާތު ދެއްވާފައިވާ ގޮތުގައި، މި އެކްސިޑެންޓް ހިނގަން މެދުވެރިވީ ޓެކްސީ ދުއްވަން އިން މީހާއަށް ދިމާވި ސިއްޙީ ކުއްލި ހާލަތެއްގެ ސަބަބުންނެވެ.

މިއަދު ހެނދުނު 10 ޖަހާކަންހާއިރު ވެލާނާ އިންޓަރނޭޝަނަލް އެއަރޕޯޓްގައި ޓެކްސީއެއް ކޮންޓުރޯލް ނުކުރެވި ގޮސްވަނީ އެކްސިޑެންޓެއް ހިނގައިފައެވެ. މި އެކްސިޑެންޓް ހިނގަން މެދުވެރިވީ ދުއްވަމުން ދިޔަ ޑްރައިވަރަށް ދިމާވި ސިއްޙީ ކުއްލި ހާލަތެއްގެ ސަބަބުންކަމަށް ޕްރެލިމިނަރީ…

— Maldives Airports Company Ltd (@MACLmedia) January 7, 2025

އެމްއޭސީއެލްއިން ވިދާޅުވެފައިވަނީ މި އެކްސިޑެންޓް ހިނގީ ދުއްވާފައިދިޔަ ޓެކްސީއެއް ކޮންޓްރޯލް ނުވެ ގޮސް ކުރިމަތިން ދުއްވާފައި ދިޔަ ޕިކަޕެއްގައި ޖެހިގެން ކަމަށެވެ. އަދި މި ހާދިސާ ހިނގި ގޮތް އިތުރަށް ބަލަމުންދާ ކަމަށްވެސް އެފަރާތުން މަޢުލޫމާތު ދެއްވާފައިވެއެވެ.

ދިވެހި ފުލުހުންގެ ޚިދުމަތުން މި އެކްސިޑެންޓާ ގުޅޭގޮތުން މަޢުލޫމާތު ދެއްވަމުން ވިދާޅުވެފައިވަނީ، ޓެކްސީ ޑްރައިވަރަށް އަނިޔާވެގެން ހުޅުމާލެ ހޮސްޕިޓަލަށް ގެންގޮސް ފަރުވާދެމުން އަންނަ ކަމަށެވެ. މީގެ އިތުރުން، އެކްސިޑެންޓް ހިނގި ވަގުތު ޓެކްސީގެ ފަހަތުގައި އިން މީހަކަށްވެސް ކުދި އަނިޔާތަކެއްވެ، އެއަރޕޯޓް ކްލިނިކްގައި ފަރުވާ ދީފައިވާ ކަމަށް ފުލުހުން ވިދާޅުވެފައިވެއެވެ.

ފުލުހުންގެ މަޢުލޫމާތުގައިވާ ގޮތުން، މި އެކްސިޑެންޓުގައި ޖެހުނު ދެ އުޅަނދަށްވެސް ބޮޑެތި ގެއްލުންތަކެއް ލިބިފައިވެއެވެ. އަދި މި މައްސަލަ ފުލުހުން ތަޙްޤީޤު ކުރަމުންދާ ކަމަށްވެސް އެފަރާތުން ވިދާޅުވެފައިވެއެވެ.