ޚަބަރު
ފ. ދަރަނބޫދޫގައި ފުލުހުން "ވޯކް އެންޑް ޓޯކް" ހަރަކާތެއް ކުރިއަށްގެންގޮސްފި

ފ. ދަރަނބޫދޫގައި ފުލުހުން ކުރިއަށް ގެންދިޔަ "ވޯކް އެންޑް ޓޯކް" ހަރަކާތް ފޮޓޯ:ފުލުހުން
ކުށްމަދު އަމާން މުޖުތަމައެއް ޤާއިމްކުރުމަށް މަސައްކަތްކުރާ ފުލުހުން، ރައްޔިތުން ހޭލުންތެރިކުރުމުގެ ގޮތުން ފ. ދަރަނބޫދޫގައި "ވޯކް އެންޑް ޓޯކް" ހަރަކާތެއް ކުރިއަށްގެންގޮސްފިއެވެ. މި ހަރަކާތް ކުރިއަށްގެންދިޔައީ މި ޖަނަވަރީ މަހުގެ 6 ވަނަ ދުވަހު، ފ. ދަރަނބޫދޫ ޕޮލިސް ޕޯސްޓުންނެވެ.
މި ހަރަކާތުގައި ފުލުހުން ވަނީ އެރަށުގައި ވިޔަފާރިކުރާ ފަރާތްތަކާއި، ދަނޑުވެރިންނާއި އަދި އާންމު ރައްޔިތުންނާ ބައްދަލުކޮށް، ކުށްމަދުކުރުމާއި ކުށްތަކުން ރައްކާތެރިވުމަށް ކުރެވިދާނެ ކަންކަމާ ގުޅޭގޮތުން މަޢުލޫމާތު ދީފައެވެ. މީގެ ތެރޭގައި ވިޔަފާރީގެ މުޢާމަލާތްތައް ކުރުމުގައި ސަމާލުކަންދޭންވީ ކަންކަމާއި، ދަނޑުވެރިންގެ ހުރި ކަންބޮޑުވުންތަކާއި، އިންޓަރނެޓް މެދުވެރިކޮށް ހިންގާ ކުށްތަކުން ރައްކާތެރިވުމަށް ކުރެވިދާނެ ކަންކަން ހިމެނެއެވެ.
ފުލުހުންގެ ފަރާތުން މަޢުލޫމާތު ދެއްވި ގޮތުގައި، ރައްޔިތުން ހޭލުންތެރިކުރުމުގެ ގޮތުން ރަށްރަށުގައި މަސައްކަތްކުރާ ފުލުހުން ދަނީ ސިލްސިލާކޮށް މިފަދަ ޕްރޮގްރާމްތައް ހިންގަމުންނެވެ. މި ހަރަކާތަކީ އެފަދަ ޕްރޮގްރާމްތަކުގެ ތެރެއިން އެއް ހަރަކާތެވެ.
މި ހަރަކާތުގެ މައިގަނޑު މަޤްޞަދަކީ ކުށްމަދު އަމާން މުޖުތަމަޢުއެއް ޤާއިމްކޮށް، ރައްޔިތުންނަކީ ހޭލުންތެރިވެފައިވާ ބަޔަކަށް ހެދުމެވެ. މިފަދަ ހަރަކާތްތަކުން ރައްޔިތުންނަށް ފުލުހުންނާ ގާތުން މުޢާމަލާތްކުރުމުގެ ފުރުޞަތު ލިބި، ދެފަރާތުގެ ގުޅުން ބަދަހިވެގެންދާނެ ކަމަށް ބެލެވެއެވެ.