ވޫލްސް ބަލިކޮށް ލިވަޕޫލްއާ 6 ޕޮއިންޓު ކައިރިއަށް ފޮރެސްޓު ޖެހިލައިފި

އިންގްލިޝް ޕްރިމިއަރ ލީގުގައި ވުލްވަރހެމްޕްޓަން 3-0 އިން ބަލިކުރުމަށްފަހު، ނޮޓިންހަމް ފޮރެސްޓުން ޖެހިޖެހިގެން 6 މެޗު ކާމިޔާބުކޮށްފިއެވެ.

މި ނަތީޖާއާއެކު ނޫނޯ އެސްޕިރީތޯ ސަންތޯސްގެ ފޮރެސްޓް، ލީގުގެ ތިންވަނައަށް ޖެހިލާފައިވާއިރު، އެ ޓީމަށާއި އާސެނަލްއަށް ލިބިފައިވަނީ 40 ޕޮއިންޓެވެ. އަދި އާސެނަލް ކުރީގައި އޮތީ ގޯލުގެ ތަފާތުންނެވެ.

މީގެ އިތުރުން ލީގުގެ އެއްވަނައިގައި އޮތް ލިވަޕޫލްއާ 6 ޕޮއިންޓު ކައިރިއަށް ޖެހިލާފައިވާއިރު، ދެން އެ ޓީމުން ނިކުންނަންޖެހޭނީ ލިވަޕޫލްއާ ދެކޮޅަށެވެ. މި ދެ ޓީމު ސެޕްޓެމްބަރުގައި ލިވަޕޫލްގެ ދަނޑުގައި ކުޅުނު މެޗު 1-0 އިން ކާމިޔާބުކުރީ ފޮރެސްޓެވެ. އަދި ޖެނުއަރީ 15 ގައި އަނެއްކާ ވެސް މި ދެ ޓީމު ބައްދަލުކުރާ މެޗު ފޮރެސްޓުން ކާމިޔާބުކޮށްފިނަމަ، އެ ޓީމު ވެސް ލީގު ރޭހަށް ރަގަޅަށް ވަނީކަމަށް ގަބޫލުކުރެވިދާނެއެވެ.

ހޯމަ ދުވަހުގެރޭ ވޫލްވްސްއާ ދެކޮޅަށް ކުޅުނު މެޗުގައި ފޮރެސްޓުން ލީޑު ނެގީ ފުރަތަމަ 7 މިނެޓުގެ ތެރޭގައެވެ. މި ގޯލު ކާމިޔާބުކޮށްދިނީ، ކުރިން ވޫލްވްސްގެ ޖާރޒީގައި ވެސް ފެނިފައިވާ މޯގަން ގިބްސް-ވައިޓްއެވެ. އެ ޓީމުގެ ދެވަނަ ގޯލު ފުރަތަމަ ހާފު ނިމެން އުޅެނިކޮށް ކާމިޔާބުކުރީ ކްރިސް ވޫޑްސްއެވެ. އަދި ފަހު ގޯލު މެޗުގެ އިތުރު ވަގުތުގައި ކާމިޔާބުކުރީ އަވޮނީޔީއެވެ. 

ފޮރެސްޓަށް ލިބުނު މި ކާމިޔާބަކީ އެ ޓީމުގެ ތާރީހީ ދުވަހެއްގައި ލިބުނު ކާމިޔާބެކެވެ. ހޯމަ ދުވަހަކީ އެ ޓީމަށް އެންމެ ގިނަ ކާމިޔާބީތައް ހޯދައިދިން ބްރިއަން ކްލޮފް އެ ޓީމުގެ ކޯޗެއްގެ މަގާމަށް އައްޔަންކުރިތާ 50 ވަނަ އަހަރީ ދުވަހެވެ. އޭނާ ވަނީ ޖެހިޖެހިގެން ދެ ޗެމްޕިއަންސް ލީގާއި، އިނގިރޭސި ޕްރިމިއަރ ލީގުގެ ތަށީގެ އިތުރުން، ޖުމްލަ 11 ތައްޓެއް ހޯދުމަށް ޓީމު ލީޑުކޮށްދީފައެވެ. 

އަދި އޭނާގެ ދައުރަށްފަހު ޖެހިޖެހިގެން 6 މެޗުން ފޮރެސްޓު މޮޅުވެފައި ނުވުމުން، މި ތާރީހީ ދުވަހު އެ ޓީމަށް މި ހޯދުނީ ތާރީހީ މޮޅެކެވެ.