ރަޖިސްޓަރ ނުކުރާ 101 މަތީ ތަޢުލީމު މަރުކަޒެއްގެ ޕްރޮގްރާމްތައް ބާޠިލުކޮށްފި

މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން މިއަދު ހާމަކުރި ގޮތުގައި، ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ މިނިސްޓްރީގައި ރަޖިސްޓަރ ނުކުރާ 101 މަތީ ތަޢުލީމު މަރުކަޒެއްގެ ޕްރޮގްރާމްތައް މިއަދުން ފެށިގެން ބާޠިލުކޮށްފިއެވެ.

އެމްކިއުއޭ އިން ނެރުނު އިއުލާނެއްގައި ބުނެފައިވާ ގޮތުން، "މަތީ ތަޢުލީމާއި ތަމްރީނުގެ ޤާނޫނު" ގެ ދަށުން، ދިވެހިރާއްޖޭގައި މަތީ ތަޢުލީމާއި ތަމްރީނު ދޭ މަރުކަޒުތައް ހިންގަންވާނީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ މިނިސްޓްރީގައި ރަޖިސްޓަރ ކުރުމަށް ފަހުގައެވެ. ނަމަވެސް، މިހާތަނަށް ރީ-ރަޖިސްޓަރ ކޮށްފައިނުވާ 101 މަރުކަޒެއްގެ ނަން ހިމެނޭ ލިސްޓެއް އެ މިނިސްޓްރީން އެމްކިއުއޭ އާއި ޙިއްސާ ކޮށްފައިވެއެވެ.

މި ސަބަބަށްޓަކައި، "މަތީ ތަޢުލީމާއި ތަމްރީނުގެ ޤާނޫނު" ގެ 21 ވަނަ މާއްދާގެ (ބ) ގެ ދަށުން، މި 101 މަރުކަޒުން ކުރިން ހުއްދަ ދީގެން ހިންގަމުން އައި ޕްރޮގްރާމްތައް މިއަދުން ފެށިގެން މޯލްޑިވްސް ކޮލިފިކޭޝަންސް އޮތޯރިޓީން ޤަބޫލުނުކުރާނެ ކަމަށް އެ އިއުލާނުގައި ބުނެފައިވެއެވެ.

އިތުރުން، އެމްކިއުއޭ ގެ ވެބްސައިޓްގެ "ޕްރޮގްރާމް އެކްރެޑިޓޭޝަން" ބައިގައިވާ "Previously Approved Programs" ލިސްޓުގައި ވާ މަރުކަޒުތަކާ ދިމާލުގައި މިކަން ފާހަގަކޮށް ވެބްސައިޓުގައި ޝާއިޢު ކުރާނެކަމަށްވެސް އެ އިއުލާނުގައި ބުނެފައިވެއެވެ.