Ads by Exprox

ޚަބަރު

މަސައްކަތް ކުރުވާފައި އަގު އަދާކޮށްފައިވާނުވާ ކުންފުނިތަކަށް އަންނަ ހަފްތާގައި 500 މިލިއަން ރުފިޔާ ދޫކުރަނީ

މަސައްކަތް ކުރުވާފައި އަގު އަދާކޮށްފައިވާނުވާ ކުންފުނިތަކަށް އަންނަ ހަފްތާގައި 500 މިލިއަން ރުފިޔާ ދޫކުރަނީ

ރައީސުލްޖުމްހޫރިއްޔާ ހޯނޑެއްދޫ ރައްޔިތުންނާ ބައްދަލުކުރެއްވުން

މިފްތާޙް މުޙައްމަދު

މިފްތާޙް މުޙައްމަދު

07 ޖެނުއަރީ 2025، 03:15

07 ޖެނުއަރީ 2025، 03:15

ހުލާސާ

ސަރުކާރު ހިއްސާވާ ކުންފުނިތައް ކަމުގައިވާ އާރްޑީސީ، އެމްޓީސީސީ އަދި ވެމްކޯ ފަދަ ކުންފުނިތަކުން އަމިއްލަ ކުންފުނިތައް މެދުވެރިކޮށް ކޮށްފައިވާ މަސައްކަތްތަކުގެ ފައިސާ ރޯދައިގެ ކުރިން ނިންމާ ހަލާސްކުރެއްވުމުގެ މަސައްކަތްކުރައްވަމުން ގެންދަވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައި.

ސަރުކާރުގެ އެކި މަސައްކަތްތައް ކުރުވުމަށްފަހު އެ މަސައްކަތްތަކުގެ އަގު އަދާކޮށްފައިނުވާ ގިނަ ދިވެހި ކުންފުނިތަކަކަށް އަންނަ ހަފްތާގެ ތެރޭގައި 500 މިލިއަން ރުފިޔާ ދޫކުރުމަށް ނިންމާފައިވާކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިހެން ވިދާޅުވީ، ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާ، އަތޮޅުތަކާ، ރަށްތަކާ، އަދި ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް މިދިޔަ އަހަރު ފަށްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުގެ ތެރެއިން މިއަދު ހެނދުނު ގދ. ހޯނޑެއްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ. 

ރައީސުލްޖުމްހޫރިއްޔާ ވިދާޅުވީ، ނިމިދިޔަ 2024 ވަނަ އަހަރު ސަރުކާރުން އައު މަޝްރޫޢުތަކަށް ބޮޑު ހޭދައެއް ކުރެވިފައި ނުވަނީ، ކުރީ ސަރުކާރުން 2024 ވަނަ އަހަރުގެ ބަޖެޓު ހެދިއިރު އައު ސަރުކާރަށް ދަތިވާގޮތަށް އެކަން ކޮށްފައި އޮތުމުން ކަމަށެވެ. އަދި ފަށާފައިވާ ގިނަ މަޝްރޫޢުތައް ހުރީ ހުއްޓިފައި ކަމަށާއި، ފަށާފައިވާ މަޝްރޫޢުތައް ކުރިޔަށް ގެންގޮސްފައި ވަނީ ވެސް ވަރަށް ލަސްކޮށްކަމަށް ރައީސުލްޖުމްހޫރިއްޔާ ފާހަގަ ކުރެއްވެވިއެވެ. 

މީގެ އިތުރުން، ކުންފުނިތަކުގެ ބަޖެޓުގެ މައްސަލަތައް އޮތްއިރު، ކުންފުނިތަކުން މަސައްކަތް ކުރުވުމަށްފަހު ދިވެހި ކުންފުނިތަކަށް ފައިސާ ނުދީ އޮތުމަކީ މި ސަރުކާރަށް ކުރިމަތިވި ގޮންޖެހުމެއްކަމަށް ވިދާޅުވެފައިވެއެވެ. އެހެންކަމުން އަންނަ ހަފްތާގައި އެ ކުންފުނިތަކުން ކޮށްފައިވާ މަސައްކަތްތަކުގެ އަގު އަދާކުރުމަށް 500 މިލިއަން ރުފިޔާ ދޫކުރުމަށް ނިންމާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.

"އަންނަ ހަފްތާގައި ސަރުކާރުން 500 މިލިއަން ރުފިޔާ އެބަ ދޫކުރަން ދިވެހި ކުންފުނިތަކަށް. މީގެތެރޭގައި ކުދި އަދި މެދުފަންތީގެ ކުންފުނިތައް ހިމެނޭ. ސަރުކާރުން މަސައްކަތްކުރުވާފައި ފައިސާ ނުދީ އެތައް ކުންފުންޏެއް އެބަހުރި."

ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން، ސަރުކާރު ހިއްސާވާ ކުންފުނިތައް ކަމުގައިވާ އާރްޑީސީ، އެމްޓީސީސީ އަދި ވެމްކޯ ފަދަ ކުންފުނިތަކުން އަމިއްލަ ކުންފުނިތައް މެދުވެރިކޮށް ކޮށްފައިވާ މަސައްކަތްތަކުގެ ފައިސާ ރޯދައިގެ ކުރިން ނިންމާ ހަލާސްކުރެއްވުމުގެ މަސައްކަތްކުރައްވަމުން ގެންދަވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

މި ލިޔުން ކިޔާލުމުން

Ads by MSS