ޤާނޫނީ އިސްލާހުތަކަކާއެކު އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް ހެޔޮ ބަދަލުތަކެއް ގެންނަނީ

އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް ގެންނަންޖެހޭ ހެޔޮ ބަދަލުތަކެއް ގެނައުމަށްޓަކައި، ރައްޔިތުންގެ މަޖިލީހުގެ މަސައްކަތްތައް ދެން ފެށޭތާ ފުރަތަމަ ހަފްތާގެ ތެރޭގައި ޤާނޫނީ އިސްލާހުތަކަށް މަސައްކަތްކުރެއްވުމަށް ފައްޓަވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ހުވަދު އަތޮޅުގެ ރަށްތަކަށް މިއަދު ފެއްޓެވި ދަތުރުފުޅުގެ ތެރެއިން، ގދ. ވާދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.

އެގޮތުން، އެ މަނިކުފާނުގެ ވަޢުދުފުޅުތައް ފުއްދެވުމަށްޓަކައި ވަޒީފާއާބެހޭ ޤާނޫނާއި ލާމަރުކަޒީ ޤާނޫނަށް އިސްލާޙް ގެންނަވަން ރައްޔިތުންގެ މަޖިލީހަށް ހުށަހަޅުއްވާނެ ކަމުގައި ވިދާޅުވިއެވެ. މި އިސްލާހުތަކުގެ ތެރޭގައި ހިމެނެނީ، އަންހެނުންގެ ކޮމެޓީތަކުގެ މެންބަރުންނަށް މިހާރު އެލަވަންސެއްގެ ގޮތުގައި ފައިސާ ދެމުންދާތީ، އެކަމާ ގުޅިގެން އެ ކަނބަލުން މަހްރޫމްވެފައިވާ ކަންކަން ހަމަޖައްސައިދިނުމުގެ އިސްލާހުތަކެވެ. 

މީގެ ތެރޭގައި، ރޯދަ އެލަވަންސް ދިނުމަށް ހުރި ހުރަސްތައް ނައްތާލުމާއި، ބޭންކުތަކުން ލޯނު ހޯދުމަށް ދިމާވާ ދަތިތަކަށް ނިމުމެއް ގެނައުމާއި އަދި ވިހެއުމުގެ ޗުއްޓީ ފަދަ ކަންކަން ހަމަޖައްސައިދިނުމުގައި ކުރިމަތިވެފައިވާ ގޮންޖެހުންތަކަށް ހައްލެއް ހޯދައިދިނުން ހިމެނެއެވެ.

ރައީސުލްޖުމްހޫރިއްޔާ ވިދާޅުވީ، މިއީ އެ މަނިކުފާނު ވެރިކަމަށް ވަޑައިގެންނެވުަމަށްފަހު ބައްދަލުކުރެއްވުނު އަންހެނުންގެ ތަރައްޤީއަށް މަސައްކަތްކުރާ ހުރިހާ ކޮމިޓީތަކަކުންވެސް އެދިލެއްވި އެއް ކަމެއް ކަމުގައެވެ. 

އެހެންކަމުން، މި ޤާނޫނީ އިސްލާހުތައް ގެނެސް، އަންނަ ރަމަޟާން މަހުން ފެށިގެން ކޮންމެ ރަމަޟާން މަހެއްގައިވެސް އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް ރޯދަ މަހުގެ އިނާޔަތް ލިބޭނެ ކަމަށާއި އަދި އެ އެލަވަންސަކީ މުސާރަ ލިބޭ އެހެން މުވައްޒަފުންނަށް ލިބޭ ކަހަލަ މުސާރައިގެ ހައިސިއްޔަތު ލިބިފައިވާ އެއްޗަކަށް ބަދަލުކުރެވޭނެކަމަށް ވިދާޅުވިއެވެ.

އަދި ޤާނޫނީ އިސްލާހުތައް ގެނެސް، މި އިނާޔަތްތައް ލިބޭނެގޮތް ހެދި ކަމުގައި ވިޔަސް، ފުލްޓައިމްކޮށް ވަޒީފާއަށް ނުކުންނަވަން ޖެހިވަޑައިނުގަންނަވާނެ ކަމަށާއި، މިހާރުވެސް މަސައްކަތް ކުރައްވާ އުޞޫލުން މަސައްކަތް ކުރެއްވުމުން އެ އިނާޔަތްތައް ލިބިވަޑައިގަންނަވާނެކަމުގެ ޔަޤީންކަން އެ މަނިކުފާނު ދެއްވިއެވެ.

މީގެ އިތުރުން، ރަށްރަށުގެ ތަރައްޤީއަށް އަންހެނުން ކުރައްވާ ބުރަ މަސައްކަތް އަގުވަޒަންކުރުމަކީ އެ މަނިކުފާނު ނުހަނު ބޭނުންވާ ކަމެއް ކަމަށާއި، އަންހެން ބޭފުޅުންނާއި ފިރިހެން ބޭފުޅުންނަކީ ހަމަހަމަކަމާ އެކީގައި، އެއް ހައިސިއްޔަތެއް ލިބިގެން، ރަށުގެ އަދި ޤައުމުގެ ތަރައްޤީއަށް މަސައްކަތްކުރާ ބައެއްގެ ގޮތުގައި ހެދުމަކީ އެ މަނިކުފާނުގެ ވިސްނުންފުޅެއްކަމުގައި ވިދާޅުވެފައިވެއެވެ.