ޚަބަރު
ވާދޫގެ ތަރައްޤީގެ މަޝްރޫޢުތަކުގައި އެންމެ އިސްކަމެއްދޭނީ ރަށުގެ ތަޢުލީމީ ދާއިރާއަށް: ރައީސުލްޖުމްހޫރިއްޔާ
ރައީސުލްޖުމްހޫރިއްޔާ ގދ. ވާދޫގެ ރައްޔިތުންނާ ބައްދަލުކުރެއްވުން
ހުލާސާ
ރައީސުލްޖުމްހޫރިއްޔާ ވިދާޅުވީ، ވާދޫއަކީ ތަޢުލީމީ ރަށެއް ކަމަށާއި، ފަޚުރުވެރި މާޒީއެއް އޮތް "ވާދޫ ދަންނަކަލޭފާނު"ގެ ރަށަށް، ސަރުކާރުތަކުން އަހައްމިއްޔަތުކަން ދެއްވަންޖެހޭކަމަށް.
މި ހިނގާ 2025 ވަނަ އަހަރަކީ އަމަލީ ތަރައްޤީގެ އަހަރު ކަމުގައި ސަރުކާރުން ކަނޑައަޅާފައިވާއިރު، ގދ. ވާދޫގެ ތަރައްޤީގެ މަޝްރޫޢުތައް ހިންގެވުމުގައި އެންމެ އިސްކަމެއް ދެއްވާނީ އެ ރަށުގެ ތަޢުލީމީ ދާއިރާގެ މަޝްރޫޢުތައް ކުރިޔަށް ގެންދެވުމަށްކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ވާދޫއަށް ވަޑައިގެން "ވާދޫ ދަންނަކަލޭފާނު"ގެ ނަންފުޅުން ނަން ދެވިފައިވާ ވާދޫގެ ޖަމާލުއްދީން ސްކޫލުގެ ހޯލުގައި، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ވާދޫއަކީ ތަޢުލީމީ ރަށެއް ކަމަށާއި، ފަޚުރުވެރި މާޒީއެއް އޮތް "ވާދޫ ދަންނަކަލޭފާނު"ގެ ރަށަށް، ސަރުކާރުތަކުން އަހައްމިއްޔަތުކަން ދެއްވަންޖެހޭކަމަށެވެ
އެގޮތުން ވާދޫ ޖަމާލުއްދީން ސްކޫލަށް ބޭނުންވާ އުމްރާނީ ތަރައްޤީގެ މަސައްކަތްތައް އަހަރުގެ ވީހާވެސް ކުރީކޮޅު ފައްޓަވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ. އަދި އުމްރާނީ ތަރައްޤީގެ އިތުރުން، ސުކޫލަށް ބޭނުންޖެހިފައިވާ އެހެނިހެން ކަންކަން ކުރެއްވުމަށްވެސް ސަރުކާރުން އެއްބާރުލުން ދެއްވާނެކަމުގެ ޔަޤީންކަން އެ މަނިކުފާނު ދެއްވެވިއެވެ.
ސްކޫލުގެ މަޝްރޫޢުތަކަށްފަހު ދެން އެންމެ އިސްކަމެއް ދެއްވާނީ ވާދޫގެ މަގުތަކަކީ ރައްޔިތުންނަށް ފަސޭހަކޮށް ބޭނުންކުރެވޭނެ މަގުތަކަކަށް ހެދުމަށްކަމަށާއި، އެއަށްފަހު އެ ރަށުގެ ސިއްޙީ ދާއިރާއާއި، ރައްޔިތުންނަށް އިޤްތިޞާދީ ބާރުވެރިކަން ހޯއްދަވައިދެއްވުމަށާއި، ރަށުގެ ކުނީގެ މައްސަލަ ޙައްލުކުރުމުގައި ވެސް ސަރުކާރުން މަސައްކަތްކުރައްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
