މަސްދޯނިތަކުގައި ލޮނުފެނުން މަސް ފިނިކުރާ ނިޒާމު ގާއިމުކުރުމަށް އަލުން ލޯނު ހުޅުވާލައިފި

މަސްދޯނިތަކުގައި ލޮނުފެނުން މަސް ފިނިކުރާ ނިޒާމު ނުވަތަ އާރްއެސްޑަބްލިއު ސިސްޓަމް ގާއިމުކުރުމަށް ދޫކުރަން ނިންމާފައިވާ ލޯނަށް އެދި ހުށަހެޅުމުގެ ފުރުޞަތު އަލުން ހުޅުވާލައިފިއެވެ. މި ލޯނަކީ މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި، އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) ގުޅިގެން ހުޅުވާލާފައިވާ ލޯނެކެވެ.

މި ލޯނަށް އެދުމަށް ފުރަތަމަ ފުރުޞަތު ހުޅުވާލީ މިދިޔަ ސެޕްޓެމްބަރު މަހުއެވެ. އޭރު މުއްދަތު ހަމަވިއިރު 39 ފަރާތުން ލޯނަށް އެދި ހުށަހަޅާފައިވާކަމަށް މަސްވެރިކަމާބެހޭ ވުޒާރާއިން މަޢުލޫމާތު ދެއްވިއެވެ. އޭގެ ތެރެއިން 19 ފަރާތެއް ޝަރުތު ހަމަވާކަމަށް ވުޒާރާއިން ވިދާޅުވިއެވެ. މިހާރު ކުރިއަށްދަނީ ޝަރުތުހަމަވާ ފަރާތްތަކާއެކު އެގްރީމަންޓްތަކުގައި ސޮއިކުރުމުގެ މަސައްކަތްކަމަށާއި، އެގްރީމަންޓްގައި ސޮއިކުރާ ހިސާބުންފެށިގެން ލޯނު ދޫކުރަމުން ގެންދާނެކަމަށްވެސް އެ ވުޒާރާއިން ވިދާޅުވިއެވެ.

މިހާރު ހުޅުވާލާފައިވާ އިތުރު ބުރުގައި ކުރީގެ ބުރަށްވުރެ އިތުރު ލުއިތަކެއް ދީފައިވެއެވެ. އެގޮތުން ހަލް ރަޖިސްޓަރީ ކޮށްފައިވާ އުޅަނދުތަކަށާއި، އިންޖީން އެޅުމުގެ މަސައްކަތް ފަށާފައިވާ 50 ފޫޓަށްވުރެ ދިގު އުޅަނދުތަކަށް މި ލޯނަށް އެދެވޭނެއެވެ. އަދި މަދުވެގެން 10 ޓަނުގެ ފިޝް ހޯލްޑިންގ ކެޕޭސިޓީ ހުންނަންޖެހޭނެއެވެ.

އެސްޑީއެފްސީ މެދުވެރިކޮށް ދޫކުރާ މި ލޯނުގެ ދަށުން ރަހުނަކާ ނުލައި 100,000 ރުފިޔާއިން ފެށިގެން 2,000,000 ރުފިޔާއާ ހަމައަށް ލޯނު ދޫކުރެވޭނެއެވެ. ލޯނު އަނބުރާ ދެއްކުމަށް 6 މަސްދުވަހުގެ ގްރޭސް ޕީރިއަޑަކާއެކު 10 އަހަރުގެ މުއްދަތެއް ދެވޭނެއެވެ.

ސަރުކާރުން ވިދާޅުވެފައިވަނީ މި މަޝްރޫޢުގެ ސަބަބުން މަސްވެރިންނަށް އައިސް ހޯދުމަށް ކުރާ ދަތުރުތަކަށް ލުއިލިބޭނެ ކަމަށެވެ. މިހާރުވެސް ދެކުނުގެ ގިނަ ދޯނިތަކެއްގައި މި ނިޒާމު ހަރުކުރެވިފައިވާއިރު، ސަރުކާރުގެ އަމާޒަކީ ހުރިހާ މަސްދޯންޏެއްގައިވެސް މި ނިޒާމު ހަރުކުރުމެވެ.