ޚަބަރު
އެމްއޭސީއެލް އާއި އާރްއޭސީއެލް އެއްކޮށްލަނީ

އެމްއޭސީއެލްގެ މެނޭޖިންގ ޑައިރެކްޓަރ އިބްރާހިމް ޝަރީފު މުހައްމަދު ފޮޓޯ:ރައީސް އޮފީސް
އެމްއޭސީއެލް އާއި ރީޖަނަލް އެއާޕޯޓްސް (އާރްއޭސީއެލް) އެއްކޮށްލުމުގެ މަސައްކަތް މި މަސް ތެރޭ ނިންމާލެވޭނެ ކަމަށް އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު މުހައްމަދު ވިދާޅުވެއްޖެ އެވެ.
ޝަރީފު ވިދާޅުވި ގޮތުގައި، މިވަގުތު ކުރިއަށް ދަނީ އާރްއޭސީއެލްގެ ވެލިއުއޭޝަން މަސައްކަތްތައް ކަމަށާއި، އެ މަސައްކަތް ވަރަށް އަވަހަށް ނިމޭނެ އެވެ. ދެ ކުންފުނި އެއްކޮށްލުމަށްފަހު، އާރްއޭސީއެލްގެ ހެޑް އޮފީހުގެ ހުރިހާ މުވައްޒަފުން ހުޅުލޭގައި ހުންނަ އެމްއޭސީއެލްގެ އޮފީސް އިމާރާތަށް ބަދަލުކުރާނެ ކަމަށް އޭނާ ވިދާޅުވި އެވެ.
އެމްއޭސީއެލް އާއި އާރްއޭސީއެލް އެއްކޮށްލާއިރު އެ ދެ ކުންފުނި ހިންގާނެ މޮޑެލް ކަނޑައަޅާނީ ފިނޭންސް މިނިސްޓްރީގެ ލަފާގެ މަތިން ކަމަށް ޝަރީފު ވިދާޅުވި އެވެ. އެހެންކަމުން، ރީޖަނަލް އެއާޕޯޓްސްގެ މެނޭޖިން ޑިރެކްޓަރަށް ވާނެ ގޮތެއް މިވަގުތު ދަންނަވަން ނޭނގޭ ކަމަށް އޭނާ ވިދާޅުވި އެވެ.
މީގެ މޮޑެލް ފައިނަލައިޒްކުރާނީ ފިނޭންސް މިނިސްޓަރުގެ ލަފާގެ މަތިން. އެސްއޯއީ ރިފޯމު ބޭފުޅުންގެ އެހީގައި އެކަން ކުރާނީ. ޓޯޓަލް މާޖާއެއްތޯ ނޫނީ ވަކި ދުވަހަކަށް ސަބްސިޑަރީއެއްތޯ ކަނޑައަޅާނީ
އިބްރާހިމް ޝަރީފު މުހައްމަދު
ޝަރީފު އިތުރަށް ވިދާޅުވި ގޮތުގައި، ކޮންމެ މޮޑެލްއަކަށް ހިންގި ނަމަވެސް، ކުންފުނީގެ ޚަރަދުތައް ކުޑަކޮށް އެ ކުންފުނީގެ ހާލަތު ރަނގަޅު ކުރުމަށް ވަރަށް ބޮޑު އިސްކަމެއް ދެވޭނެ އެވެ. ނަމަވެސް، ދެ ކުންފުނި އެއްކޮށްލި ނަމަވެސް، މިވަގުތު މަސައްކަތްކުރާ އެއްވެސް މުވައްޒަފެއް ވަކިކުރުމުގެ ވިސްނުމެއް ނެތް ކަމަށް އޭނާ ވިދާޅުވި އެވެ.
ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް، ޚަރަދު ކުޑަކުރުމުގެ ގޮތުން، އެމްއޭސީއެލް އާއި އާރްއޭސީއެލް އެއްކޮށްލަން ސަރުކާރުން ނިންމީ މިދިޔަ ސެޕްޓެމްބަރު މަހު އެވެ. އާރްއޭސީއެލް އަކީ ބަޖެޓުން ބޮޑު ހޭދައެއް ކޮށްގެން ހިންގާ ކުންފުންޏެއް ކަމަށާއި، 2023 ވަނަ އަހަރު އެ ކުންފުންޏަށް 95 މިލިއަން ރުފިޔާގެ ގެއްލުންވެފައިވާ ކަމަށް ވެސް ފާހަގަކުރެވެ އެވެ.