ޢައްޒާއަށް އިސްރާއީލުން ދިން ހަމަލާގައި 15 ދުވަހުގެ ކުއްޖެއް ޝަހީދުކޮށްލައިފި

ޢައްޒާގައި އިސްރާއީލުގެ ހަމަލާތައް އިތުރަށް ހަރުކަށިވަމުންދާ ކަމަށް ބައިނަލްއަޤްވާމީ މީޑިއާތަކުން ރިޕޯޓުކުރަމުންދެއެވެ. އެންމެ ފަހުން ދިން ހަމަލާތަކުގައި މަދުވެގެން 9 މީހުން ޝަހީދުވެފައިވާ ކަމަށާއި، އޭގެ ތެރޭގައި 15 ދުވަސް ވެފައިވާ ކުއްޖަކު ހިމެނޭ ކަމަށް ބުނެއެވެ.

މިއީ އިސްރާއީލުން "ރައްކާތެރި ސަރަޙައްދު" ކަމަށް ބުނެ އިޢުލާނުކޮށްފައިވާ އަލް-މަވާސީ ސަރަޙައްދަށް ދިން ހަމަލާއެއްގައި 5 ކުދިން ޝަހީދުވުމަށްފަހު ދިން ހަމަލާތަކެކެވެ.

މި ހަނގުރާމައިގައި މިހާތަނަށް 45،885 ފަލަސްޠީނު ރައްޔިތުން ޝަހީދުވެ، 109،196 މީހުންނަށް އަނިޔާވެފައިވާ ކަމަށް ވެއެވެ. އަދި އޮކްޓޯބަރު 7 ގައި ހަމާސްއިން އިސްރާއީލަށް ދިން ހަމަލާގައި 1،139 އިސްރާއީލު މީހުން މަރުވެ، 200 އަށްވުރެ ގިނަ މީހުން ހައްޔަރުކުރެވުނު ކަމަށް ބުނެއެވެ.

އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕް ވަނީ އޭނާ މަޤާމާ ހަވާލުވުމުގެ ކުރިން ހަމާސްއިން ހިފަހައްޓާފައިވާ އިސްރާއީލު މީހުން ދޫކޮށްލުމަށް އިންޒާރު ދީފައެވެ. އެހެންނޫންނަމަ "ނުރައްކާތެރި ހާލަތެއް" އަންނާނެ ކަމަށް އޭނާ ބުނެފައިވެއެވެ.

އަނެއްކޮޅުން، ލުބުނާނުގެ ބޮޑުވަޒީރު ނަޖީބު މިކާތީ ވަނީ އިސްރާއީލާއި ހިޒްބުއްލާއާ ދެމެދު ވެފައިވާ ހަނގުރާމަ ހުއްޓުމުގެ އެއްބަސްވުން އިސްރާއީލުން ތަކުރާރުކޮށް ނަގާލަމުންދާތީ ކަންބޮޑުވުން ފާޅުކޮށްފައެވެ. އަދި ލުބުނާނުގެ ސިފައިން ދެކުނު ސަރަޙައްދުތަކަށް ފޮނުވާފައިވާ ކަމަށްވެސް ބުނެއެވެ.