އެތުލީޓުންނަށް ތަމްރީނު ހޯދައިދިނުމަށް ޗައިނާއާއެކު މަޝްވަރާ ކުރަނީ

ކުޅިވަރުގެ ރޮނގުން ކުރިއަރާފައިވާ ޗައިނާގެ ސިޓީއެއް ކަމުގައިވާ، ޝިއަމެންއާއި ގުޅިގެން އެތުލީޓުންނަށް ތަމްރީނު ހޯދައިދިނުމުގެ އެކްސްޗޭންގް ޕްރޮގްރާމެއް ފެށުމަށް މަސައްކަތް ކުރަމުން އަންނަކަމަށް، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. 

ވަޒީރު މިހެން ވިދާޅުވީ، "ސީ އެންޑް ޑީ ޝިއަމެން މެރަތަން 2025" ގައި ބައިވެރިވެވަޑައިގެންނެވުމަށް އެ މަނިކުފާނަށް ލިބިލެއްވި ދައުވަތަކަށް، އެ ގައުމަށް ކުރެއްވެވި ދަތުތުފުޅުގެ ތެރެއިން ޒިންހުއާ ގްލޯބަލް ސާވިސްއަށް ދެއްވި ބަސްދީގަތުމެއްގައެވެ.

އެ މަނިކުފާނު ވިދާޅުވެފައިވާ ގޮތުގައި، ކުޅިވަރުގެ ދާއިރާއިން ރާއްޖެއަށް އެހީ ހޯދޭނެ ގޮތްތަކާ ގުޅޭގޮތުންނާއި، އެތުލީޓް އެކްސްޗޭންޖް ޕްރޮގްރާމެއް ފެށުމަށް ކަމާގުޅުންހުރި ފަރާތްތަކާ މަޝްވަރާ ކުރައްވާފައިވާކަމަށެވެ. އަދި މިކަމަށް އުއްމީދުކުރައްވާކަމުގައި ވެސް ވަޒީރު ވަނީ ވިދާޅުވެފައެވެ.

މިކަމަށްޓަކައި ޝިއަމެންއާ އޮންނަ ގުޅުން ބަދަހިކުރަންޖެހޭ ކަމަށާއި، މިކަމަށް އޮތް އެންމެ ބޮޑު ފުރުސަތަކީ، އެ ސިޓީއާއި ރާއްޖެއާ ދެމެދު ހަފްތާއަކު ދެ ފްލައިޓް އޮތުންކަމަށް މިނިސްޓަރުގެ ބަސްދީގަތުމުގައި ފާހަގަކުރެއްވެވިއެވެ.

"ސީ އެންޑް ޑީ ޝިއަމެން މެރަތަން 2025"ގައި ވަޒީރު ވަނީ 5 ކިލޯމީޓަރަށް ހާއްސަ ކުރެވިފައިވާ އިވެންޓު ފުރިހަމަކުރައްވާފައެވެ. މި މެރެތަން މި މަހުގެ 1 އިން 7 އަށް ކުރިޔަށްގެންގޮސްފައިވާއިރު، މެރަތަން ފެށުމުގެ ގޮތުން ބޭއްވި ގަންފަޔަރ ސެރަމަނީގައިވެސް ވަޒީރު ބައިވެރިވެވަޑައިގެންނެވިއެވެ.

ޗައިނީސް އެތުލެޓިކްސް އެސޯސިއޭޝަނާއި، ވޯލްޑް އެތުލެޓިކްސް ގުޅިގެން ކޮންމެ އަހަރަކުވެސް ބާއްވަމުން އަންނަ މި މެރަތަންގައި މި އަހަރު 42 ގައުމަކުން 35،000 ދުވުންތެރިން ބައިވެރިވިއެވެ.