އިސްލާމީ އިންވެސްޓްމަންޓް ޕްލެޓްފޯމެއްގެ އިޝްތިހާރުތަކެއް މަނާކޮށްފި

އިސްލާމީ އިންވެސްޓްމަންޓް ޕްލެޓްފޯމެއް ކަމަށްވާ ވާހިދް އިންވެސްޓްގެ 6 އިޝްތިހާރު، ބޮޑެތި ފާޑުކިއުންތަކާއި ކުރިމަތިވުމާ ގުޅިގެން އުވާލައިފިއެވެ. މި އިޝްތިހާރުތަކުގައި އެމެރިކާ ޑޮލަރާއި ޔޫރޯ ނޫޓުތައް އަނދަމުންދާ މަންޒަރު ދައްކާފައިވާތީ، ރެގިއުލޭޓަރީ އިދާރާއަކުން މިފަދައިން ނިންމާފައިވެއެވެ.

2023 ވަނަ އަހަރުގެ ސެޕްޓެމްބަރު އަދި އޮކްޓޯބަރު މަހު ލަންޑަނުގެ ޓްރާންސްޕޯޓް ފޯ ލަންޑަން (ޓީއެފްއެލް) ގެ ޚިދުމަތްތަކުގައި، އޭގެ ތެރޭގައި މެޓްރޯ އަދި ބަސްތަކުން މި އިޝްތިހާރުތައް ފެނިފައިވެއެވެ. މި އިޝްތިހާރުތަކުގައި ދާޢީ އިސްމާޢީލް އިބްނު މޫސާ މެންކް އަދި ކުރީގެ ރަޝިއަން މާޝަލް އާޓްސް ފައިޓަރ ޚަބީބް އަބްދުލްމަނާޕޮވިޗް ފެނިފައިވެއެވެ. މިއިސްތިހާރުގައި އެ ދެ ބޭފުޅުންގެ އިނގިލިން މައްޗަށް އިޝާރާތްކުރާތަން ދައްކާ ، އަނދަމުންދާ ފައިސާ ނޫޓުތަކެއް ދައްކާފައިވެއެވެ.

އިޝްތިހާރުތަކުގައި "ފައިސާގެ އިންޤިލާބާ ގުޅޭ" ފަދަ ޢިބާރާތްތައް ބޭނުންކޮށްފައިވާއިރު، އޭގެ ތެރެއިން އެއްއިސްތިހާރުގައި މެންކް އަތުގައި އަނދަމުންދާ ޑޮލަރު އަދި ޔޫރޯ ނޫޓުތަކުން ފުރިފައިވާ ބްރީފްކޭހެއް އޮތްތަން ދައްކާފައިވެއެވެ. މީގެ އިތުރުން "އިސްތިޣްލާލުން ދުރުވާށެވެ" އަދި "ރިބާއިން ދުރުވާށެވެ" ފަދަ ޢިބާރާތްތައްވެސް ބޭނުންކޮށްފައިވެއެވެ.

އިޝްތިހާރުތަކުގެ ތެރެއިން އެއް އިޝްތިހާރުގައި ބުނެފައިވަނީ، "ކުރީގައި މީހުންގެ އަތުން ފައިސާ ދަރަންޏަށް ނެގުމަށް ފީ ނެގުމަކީ އިސްތިޣްލާލު ކުރުން ކަމުގައި ބެލެވުނެވެ. ނަމަވެސް މިހާރު އެ ވިސްނުން ބަދަލުވެ، އިންޓްރެސްޓްގެ ސަބަބުން މުއްސަނދިންނާއި ފަގީރުންގެ ދެމެދު ބޮޑު ފަރަގެއް އުފެދިފައިވެއެވެ. މަދު ބަޔަކު މުއްސަނދިވަމުންދާއިރު ގިނަ ބަޔަކު ފަގީރުވަމުންދެއެވެ. އިންސާފުވެރި ނިޒާމަކަށް ފައިސާ ބަދަލުކުރަމުންދާ އާ ޖަމާޢަތާ ގުޅޭށެވެ. އެއީ ތިޔަބައިމީހުންނަށް ޚިދުމަތްކުރާނެ ނިޒާމެކެވެ! މިހާރުން މިހާރަށް ވާހިދް ޑައުންލޯޑް ކުރާށެވެ. ފައިސާގެ އިންޤިލާބާ ގުޅޭށެވެ."

މި އިޝްތިހާރުތަކުގެ ސަބަބުން ގިނަ ބަޔަކަށް ނޭދެވޭ އަސަރުކޮށްފާނެ ކަމަށް ބުނެ، ރެގިއުލޭޓަރީ އިދާރާއިން މި އިޝްތިހާރުތައް މަނާކޮށް އުވާލުމަށް ނިންމާފައިވާކަން ފާހަގަކުރެވެއެވެ.