އެމްޓީސީސީގެ މަޝްރޫޢުތަކުގެ ތަފްސީލު ހިމެނޭ ޑޭޝް ބޯޑެއް ތަޢާރަފްކޮށްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ) އިން ކުރިއަށް ގެންދާ މަޝްރޫޢުތަކުގެ ތަފްސީލު ހިމެނޭ ޑޭޝް ބޯޑެއް "އެމްޓީސީސީ ޕްރޮޖެކްޓްސް" ގެ ނަމުގައި އިއްޔެ ތަޢާރަފްކޮށްފިއެވެ.

އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީގެ އިސްނެންގެވުމާއި އިރުޝާދުގެ ދަށުން ތަޢާރަފްކުރި މި ޑޭޝް ބޯޑުން، އެކުންފުނިން ހިންގާ މަޝްރޫޢުތަކުގެ ތަފްސީލާއި، ރަށްރަށުގައި ހިންގާ މަޝްރޫޢުތަކާ ގުޅޭ ބައެއް މަޢުލޫމާތުތަކާއި އެ މަޝްރޫޢުތަކުގެ މަސައްކަތް ގޮސްފައިވާ ހިސާބު ބެލޭނެއެވެ. މީގެ އިތުރުން މަޝްރޫޢުގެ ބާވަތާއި ސްކޯޕާއި އަގު އަދި ނިމިފައިވާ ޕަސެންޓުވެސް މި ޑޭޝް ބޯޑުން ފެންނަން ހުންނާނެކަމަށް އެމްޓީސީސީން މަޢުލޫމާތު ދީފައިވެއެވެ.

އެމްޓީސީސީ ޕްރޮޖެކްޓްސްގައި ޢާންމުކޮށްފައިވާ މަޢުލޫމާތުން ދައްކާގޮތުގައި، އެމްޓީސީސީއާ 152 މަޝްރޫޢެއް ހިންގުމަށް ހަވާލުކޮށްފައިވެއެވެ. މީގެ ތެރެއިން މިހާރު މަސައްކަތް ހިނގަމުންދަނީ 59 މަޝްރޫޢެއްގައެވެ. އަދި އެކި ސަބަބުތަކާހުރެ 48 މަޝްރޫޢެއް ހުއްޓިފައިވާއިރު، 45 މަޝްރޫޢެއްގެ މަސައްކަތް އަދި ނުފަށާކަން ވެބްސައިޓުގައިވާ މަޢުލޫމާތުން އެނގެއެވެ.

އެމްޓީސީސީން ބުނާގޮތުގައި މިފަދަ ޑޭޝް ބޯޑެއް ތަޢާރަފްކުރުމުގެ މަޤްޞަދަކީ އެމްޓީސީސީން ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތަކުގެ އެންމެ ފަހުގެ މަޢުލޫމާތު ދިވެހި ރައްޔިތުންނަށް ދެފުށް ފެންނަ ގޮތަށް ފަސޭހައިން ބެލޭނެ ގޮތް ހެދުމެވެ.

ނިމިދިޔަ ސަރުކާރުން އެމްޓީސީސީއާ ގިނަ މަޝްރޫޢުތަކެއް ހަވާލުކޮށްފައިވީނަމަވެސް، ސަރުކާރު ބަދަލުވީއިރު މީގެ ތެރެއިން 50 މަޝްރޫޢެއްގެ މަސައްކަތް ނުފަށާކަމަށް މިހާރުގެ ސަރުކާރުންވަނީ ބުނެފައެވެ. ނަމަވެސް، މި މަޝްރޫޢުތަކުގެ ތެރެއިން ބައެއް މަޝްރޫޢުތަކުގެ ޢަމަލީ މަސައްކަތް މިހާރުގެ ސަރުކާރުން ވަނީ ފަށާފައެވެ.

އެމްޓީސީސީއަކީ ރާއްޖޭގެ ރަށްރަށުގައި ޢުމްރާނީ ތަރައްޤީއާ ގުޅުންހުރި ގިނަ މަޝްރޫޢުތަކެއް ހިންގަމުންދާ ކުންފުންޏެކެވެ.