ރަޖުނީއަށް ވިނަރެސް ފްލެޓު ލިބުނީ އުސޫލާ ޚިލާފަށް ނޫންކަމަށް ފުލުހުން ބުނެފި

މޯލްޑިވްސް ޕޮލިސް ސަރވިސަސްގެ އިކޮނޮމިކް ކްރައިމް ޑިޕާޓްމެންޓްގެ ހެޑް، ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބަށް ވިނަރެސް ފުލެޓު ލިބުނީ އުސޫލާ ޚިލާފަށްކަމަށް ފެތުރުނު އަޑުތައް ފުލުހުން ދޮގުކޮށްފިއެވެ.

އެ މުއައްސަސާއިން ހާމަކޮށްފައިވާ ގޮތުގައި، ރަޖުނީއަށް ވިނަރެސް ހައުސިންގ މަޝްރޫއުން އުސޫލާ ހިލާފަށް ފްލެޓެއް ލިބިފައިވާ ކަމަށް ބުނެ އާންމު މީޑިއާގައި ފެތުރުނު މަޢުލޫމާތާ ގުޅިގެން، އޭނާ މަސައްކަތުން އެކަހެރިކޮށް އެކަން ހިނގާފައިވާގޮތް ބެލުނު ކަމަށެވެ.

ރަޖުނީ މަސައްކަތުން އެކަހެރިކުރި ސަބަބަކަށް ފުލުހުން އޭރު ބުނީ، އެއީ އިކޮނޮމިކް ކްރައިމް އިންވެސްޓިގޭޝަންސްގައި މި ވަގުތު ކުރަމުން ގެންދާ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމަށާއި އަދި އެ ތަހުގީގަށް އެއްވެސް ނުރަނގަޅު އަސަރެއް ނުފޯރާނެކަން ޔަގީން ކުރުމަށެވެ.

ރަޖުނީއަށް ތުހުމަތުކުރެވޭ މައްސަލަ ބެލިބެލުމުން އޭނާއަށް ވިނަރެސް ފްލެޓް ލިބުމުގައި އުސޫލާ ޚިލާފު އެއްވެސްކަމެއް ހިނގާފައިނުވާކަމަށް ޕޮލިހުން ހާމަކޮށްފައިވެއެވެ.

ސުޕްރިންޓެންޑެންޓް އޮފް ޕޮލިސް ރަޖުނީ ޝުޢައިބު، މަސްއޫލިއްޔަތު ތަކުން އެކަހެރިކޮށް، ފްލެޓެއް ލިބުމުގައި އެއްވެސް އުސޫލަކާ ހިލާފު އަމަލެއް ހިނގާފައިވޭތޯ ކަމާބެހޭ އިދާރާތަކުން ހިއްސާކޮށްފައިވާ މައުލޫމާތައް ދިރާސާކޮށް ބެލިބެލުމުން އެފަދަ ކަމެއް ފާހަގަކުރެވިފައި ނުވާ ވާހަކަ ދަންނަވަމެވެ.

ޕޮލިހުން ޙިއްސާކުރި މެސެޖުގައި ވެއެވެ.

ރަޖުނީއާ ގުޅޭގޮތުން މިފަދަ ވާހަކަތަކެއް ސޯޝަލް މީޑިއާގައި ފެތުރުނީ، ޤަވާއިދާއި ޚިލާފަށް ހުޅުމާލެއިން ގޯތިތަކެއް ދޫކޮށްފައިވާ މައްސަލައާ ގުޅިގެން، ޕޮލިހުން ބޭއްވި ނޫސްވެރިންގެ ބައްދަލުވުމުގައި އޭނާ ބައިވެރިވި ފަހުންނެވެ. 

މަޢުލޫމާތު ލިބިފައިވާ ގޮތުގައި ރަޖުނީއަށް ވިނަރެސް ފްލެޓެއް ދޫކުރަން އެޗްޑީސީން ނިންމާފައިވަނީ 2022 ވަނަ އަހަރެވެ. އެއީ ހިޔާ ފްލެޓްގެ ބަދަލުގައި ވިނަރެސް ފްލެޓް ހޯދަން ހުޅުވާލި ފުރުސަތުގައި އޭނާ އެކަމަށް އެދިގެން ހޯދާފައިވާ ފުރުސަތެއްކަން ވަނީ އެނގިފައެވެ.