ދަތިޙާލަތް މެދުވެރިވެފައިވާ އުމްރާވެރިންގެ ހާލު ސަރުކާރުން ދަނީ ގާތުން ބަލަމުން: މިނިސްޓަރު ޝަހީމް

ހިޖުރަ ނަމަކަށް ކިޔާ ގްރޫޕެއްގެ ހަވާލުގައި ޢުމްރާއަށް ގޮސްފައިވާ ދިވެހީންނަށް ދިމާވެފައިވާ ދަތިޙާލަތު ވަރަށް ކައިރިން ބަލަމުން އަންނަކަމަށް، އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިނިސްޓަރ ޝަހީމް ސޯޝަލް މީޑިއާގައި ކުރެއްވެވި ޕޯސްޓެއްގައި ވިދާޅުވީ، މައްކާގައި ތިބި އެ ޢުމްރާވެރިންނާ މިނިސްޓަރު ފޯނުން ގުޅުއްވާ އެމީހުންގެ ހާލަތު ބަލާފައިވާކަމަށާއި، އެބޭފުޅުންނަށް ދިމާވެފައިވާ ދަތިކަން ޙައްލުކުރުމަށް މަސައްކަތްކުރައްވަމުން އަންނަ ކަމަށެވެ.

މީގެ އިތުރުން، މިކަމުގައި އިޙުމާލުވެފައިވާ ހިޖުރަ ގްރޫޕުގެ ވެރިންގެ މައްސަލަ ތަޙުޤީޤުކޮށް ފިޔަވަޅު އަޅާނެކަމަށް ވެސް މިނިސްޓަރު ވަނީ ވިދާޅުވެފައެވެ.

މި މައްސަލައާ ގުޅިގެން މިނިސްޓަރު ޝަހީމް ޕީއެސްއެމް ނިއުސްއަށް މަޢުލޫމާތު ދެއްވަމުން ފާހަގަކުރައްވާފައިވާ ގޮތުގައި، ޢުމްރާއަށް މީހުން ގެންދާ ފަރާތްތަކުން، ޢުމްރާވެރިންގެ ފުރިހަމަ ޒިންމާ ނަގަންޖެހޭނެއެވެ. އަދި ޢުމްރާއަށް މީހުން ގެންދިއުމަށް ފައިސާ ނެގުމަށްފަހު އެ ފައިސާ އެހެންކަންކަމަށް ބޭނުންކޮށް ޢުމްރާވެރިން ހާލުގައި ޖެއްސުމަކީ ވަރަށް ބޮޑު މައްސަލައެއް ކަމަށެވެ.

މިނިސްޓަރ އިތުރަށް ވިދާޅުވީ، މިވަގުތު މައްކާގައި ތިބި ޙައްޖު ކޯޕަރޭޝަންގެ ފަރާތްތައް މެދުވެރިކޮށް، ޢުމްރާވެރިންނަށް އެހީތެރިވުމުގެ މަސައްކަތް ކުރައްވަމުން އަންނަކަމަށެވެ.

މައްކާގައި މިވަގުތުގައި އޮތް މޯލްޑިވްސް ޙައްޖު ކޯޕަރޭޝަންގެ މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމަށް މިދަނީ މަސައްކަތްކުރަމުން. އަޅުގަނޑުވާނީ ހައްޖު ކޯޕަރޭޝަންގެ އެމްޑީއަށް އިރުޝާދު ދީފަ.

އުމްރާވެރިންނަށް އެހީތެރިކަން ފޯރުކޮށްދިނުމަށް ކުރައްވަމުން ގެންދަވާ މަސައްކަތްޕުޅު ހިއްސާކުރައްވަމުން މިނިސްޓަރު ވިދާޅުވިއެވެ.

މަޢުލުމާތު ލިބިފައިވާ ގޮތުގައި، މި މައްސަލައިގައި އިހުމާލުވެފައިވާ ޙިޖުރަ ގްރޫޕުން އުމްރާއަށް ގެންގޮސްފައިވަނީ 24 ފަރާތެކެވެ. އަދި މި މައްސަލަ ދިމާވީ ޢުމްރާއަށް ދިޔަ މީހުން މާލެ އައުމަށް ޓިކެޓް ނަގަން ހުރި ފައިސާ އެ ކުންފުނިން އެހެންކަންކަމަށް ޚަރަދުކުރުމުންކަމަށްވެސް މަޢުލޫމާތު ލިބެއެވެ.