ސާފް ޗެމްޕިއަންޝިޕް ހޯމް އެންޑް އަވޭ އުސޫލުން ކުޅެން ނިންމައިފި

ސައުތު އޭޝިއާގެ ގައުމުތަކުގެ މެދުގައި ދެ އަހަރުން އެއް އަހަރު ކުޅެމުން އަންނަ ސާފު ޗެމްޕިއަންޝިޕް މުބާރާތް، ހޯމް އެންޑް އަވޭ އުސޫލުން ކުޅުމަށް ސައުތު އޭޝިއަން ފުޓްބޯލް ފެޑެރޭޝަން (ސާފް) އިން ނިންމައިފިއެވެ. މި މުބާރާތުގެ ފޯމެޓު ބަދަލުކުރުމަށް ނިންމީ، ނޭޕާލުގެ ކަތުމަންޑޫގައި ކުރިޔަށްދިޔަ ސާފްގެ އެގްޒެކެޓިވް ކޮމެޓީގެ ބައްދަލުވުމަކަށްފަހުއެވެ.

މި ބަދަލާއެކު، މި އަހަރު އޮންނަ މުބާރާތް ދޮޅުމަސްދުވަހަށް ދެމިގެންދާނެއެވެ. އެގޮތުން ޖޫން މަހު މުބާރާތް ފެށުމަށް ނިންމާފައިވާއިރު، ޖުލައި މަހާ ހިސާބަށް މުބާރާތް ދިގުދެމިގެން ދާނެއެވެ. އަދި މި ބަދަލާއެކު، ކޮންމެ ގައުމަކަށް ވެސް އެ ގައުމުގައި މެޗުތަކެއް ކުޅުމުގެ ފުރުސަތު ލިބޭނެއެވެ.

މި މުބާރާތުގެ ތާރީޙުގައި، އެއް ފަހަރު މެނުވީ ދެ ދަނޑެއްގައި މުބާރާތުގެ މެޗުތައް ކުޅެފައެއް ނުވެއެވެ. މުޅިންވެސް ސެންޓްރަލްކޮށް އެއް ދަނޑެއްގައި ކުޅެމުން އައި މި މުބާރާތް، އެއް ދަނޑަށްވުރެން ގިނަ ދަނޑުގައި ކުޅުނީ 2008 ވަނަ އަހަރުއެވެ. އެ ފަހަރު މުބާރާތް ބޭއްވީ ރާއްޖެ އާއި ސްރީލަންކާގައެވެ. އަދި އެއީ ފުރަތަމަ ފަހަރަށް ދިވެހިރާއްޖެއިން ސާފް ޗެމްޕިއަންޝިޕް ކާމިޔާބުކުރި ފަހަރު ވެސް މެއެވެ.

މީގެ ކުރިން 2022 ވަނަ އަހަރު ކުޅުނު ސާފް ޗެމްޕިއަންޝިޕް ވެސް ހޯމް އެންޑް އަވޭ އުސޫލަށް ކުޅުމަށް މަސައްކަތްކޮށްފައި ވެއެވެ. ނަމަވެސް، އެ ފޯމެޓަށް މުބާރާތް ކުރިޔަށް ނުގެންދެވުނީ، އެ ފޯމެޓަށް މުބާރާތް ކުރިޔަށް ގެންދިއުމަށް އޭރު ފައިސާ ހަމަޖެހިފައި ނުވާތީއެވެ. 

އަދި އެންމެ ފަހުން މި މުބާރާތް 2023 ވަނަ އަހަރު އިންޑިއާގައި ބޭއްވިއިރު، ދައުވަތު ދީގެން މުބާރާތުގައި މުޅިން އަލަށް ދެ ޓީމެއް ބައިވެރިކުރިއެވެ. އެއީ ކުވެއިތާ ލުބުނާނެވެ. ނަމަވެސް ދައުވަތު ދީގެން ޓީމުތައް ބައިވެރި ކުރުމަކީ ރަގަޅު ގޮތެއް ނޫންކަމަށް ސާފް އިން ވަނީ ފަހުން ނިންމާފައެވެ.