ޢުމްރާވެރިން ހާލުގައި ޖެއްސި އަލް-ޙިޖްރަ ކުންފުނީގެ ޙުއްދަ ހިފަހައްޓައި ޖޫރިމަނާކޮށް އިތުރު ފިޔަވަޅުތަކެއް އަޅައިފި

އަލް-ޙިޖްރަ ކުންފުނީގެ ހަވާލުގައި ޢުމްރާއަށް ގޮސްފައިވާ ބަޔަކު ހާލުގައި ޖައްސައި، އެމީހުންނަށް އިޙުމާލުވެ، ޢުމްރާއަށް މީހުން ގެންދިޔުމުގެ އުޞޫލުތަކާ ޚިލާފުވުމުގެ ސަބަބުން، އިސްލާމީ ކަންތައްތަކާ ބެހޭ ވުޒާރާއިން އެ ކުންފުނީގެ ޙުއްދަ ހިފަހައްޓައި، ޖޫރިމަނާކުރުމާއެކު އިތުރު ފިޔަވަޅުތަކެއް އަޅައިފިއެވެ.

އިސްލާމީ ކަންތައްތަކާބެހޭ ވުޒާރާއިން ހާމަކޮށްފައިވާ ގޮތުގައި، އަލް-ޙިޖްރަ ޓްރެވަލް އެންޑް ޓުއާރސް ޕްރައިވެޓް ލިމިޓެޑުގެ ހަވާލުގައި މިދިޔަ ޑިސެންބަރު މަހު ޢުމްރާއަށް ގޮސްފައިވާ މީހުން ރާއްޖެއަށް އައުމުގެ ޓިކެޓު ހަމަނުޖައްސާ، އެކަމަށް ހުރި ފައިސާ އެހެންކަމަކަށް އެކުންފުނިން ބޭނުންކޮށްފައިވާކަމަށް މިހާރު ވަނީ އިޢުތިރާފުވެފައެވެ.

އެހެންކަމުން، އިސްލާމީ ކަންތައްތަކާބެހޭ ވުޒާރާއިން އަލް-ޙިޖްރަ ގްރޫޕް ޖޫރިމަނާ ކުރީ އެއްލައްކަ ރުފިޔާއިންނެވެ. 

އެ ގްރޫޕުގެ ހަވާލުގައި ޢުމްރާއަށް ގޮސްފައިވާ މީހުން ހާލުގައި ޖެހިގެން އެކަން އިސްލާމީ ކަންތައްތަކާބެހޭ ވުޒާރާއަށް ބުދަ ދުވަހު އެންގުމާގުޅިގެން، އެ ވުޒާރާއިން ވަނީ ވަގުތުން ފިޔަވަޅު އަޅާފައެވެ. އެގޮތުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ބުދަދުވަހު ވިދާޅުވީ، މައްކާގައި ތިބި ޙައްޖު ކޯޕަރޭޝަންގެ ފަރާތްތައް މެދުވެރިކޮށް އެމީހުނަށް އެހީތެރިވުމުގެ މަސައްކަތް ކުރިޔަށް ގެންދަވާ ކަމަށެވެ.

އަދި އެ ވުޒާރާއިން މިއަދު ހާމަކުރީ، ރާއްޖެ ނާދެވި ތިބި 23 އުމްރާވެރިން މޯލްޑިވްސް ޙައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް މިހާރު ގެންގޮސްފައިވާކަމަށެވެ. 

އަލް-ޙިޖްރަ ގްރޫޕުގެ މި ޢަމަލާ ގުޅިގެން އެ ކުންފުންޏާ ދެކޮޅަށް މިހާރު ވަނީ ގިނަ ފިޔަވަޅުތަކެއް އަޅާފައެވެ. އެގޮތުން، އެ ކުންފުނީގެ ޙުއްދަ ހިފަހައްޓާ، ޖޫރިމަނާކުރުމުގެ އިތުރުން، އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށްވެސް ޢުމްރާއަށް މީހުން ގެންދިއުމުގެ ޙުއްދަ ނުދިނުމަށާ، އެ ކުންފުނިން ޢުމްރާއަށް ގެންދިޔަ މީހުން ހާލުގައި ޖައްސާ، އެމީހުން ރާޢްޖެ ގެނައުމަށް އިސްލާމީ ކަންތައްތަކާ ބެހޭ ވުޒާރާއިން ކުރި ޚަރަދު އެ ކުންފުނިން ހޯދުމަށްވެސް ނިންމާފައިވެއެވެ. އަދި މީގެ އިތުރުން މި މައްސަލަ އިތުރަށް ތަޙުޤީޤުކޮށް ޤާނޫނީ ފިޔަވަޅު އެޅުމަށް ފުލުހުންނަށްވެސް ވަނީ ހުށަހަޅާފައެވެ.

އިސްލާމީ ކަންތައްތަކާބެހޭ ވުޒާރާއިން ހާމަކޮށްފައިވާ ގޮތުގައި، ހާލުގައި ޖެހިފައިތިބި މީހުން ހޮނިހިރު ދުވަހު މާލެ ގެނައުމުގެ މަސައްކަތް މިހާރު އަންނަނީ ކުރަމުންނެވެ. އަދި އެމީހުން ރާއްޖެ އާދެވެންދެން ކެއިންބުއިމާއި ހުރުމުގެ އިންތިޒާމުތައް ޙައްޖު ކޯޕަރޭޝަނުން ހަމަޖައްސަވާދެއްވާނެކަމަށްވެސް އެ ވުޒާރާއިން ވަނީ ވިދާޅުވެފައެވެ.

މިފަދަ ޙާލެއް ޢުމްރާވެރިންތަކަކަށް މިދިޔަ އަހަރު ޖެއްސި މައްސަލައަކާ ގުޅިގެން، އަލް-މަޝްއަރު ޓުއާސް ނަމަކަށް ކިޔާ އެޖެންސީއެއްގެ މައްޗަށް ދަޢުވާ ކުރުމަށް ފޮނުވާފައިވާކަމަށް ވެސް ފުލުހުން މިއަދު ހާމަކޮށްފައިވެއެވެ.