ވަޒީފާގެ މަސްއޫލިއްޔަތަކީ އަމާނާތެއް: ޚުޠުބާ

މުވައްޒަފެއްގެ ހައިސިއްޔަތުން ތިބާ އެއްބަސްވެ، ސޮއިކުރި ވަޒީފާ ބަޔާނާ އެއްގޮތަށް ޢަމަލުކޮށް، އެ ބަޔާނުގައިވާ މަސްއޫލިއްޔަތުތައް ފުރިހަމަ ގޮތުގައި އަދާކުރުމަކީ އަމާނާތެއްކަމުގައި މިއަދުގެ ހުކުރު ޚުޠުބާގައި ބުނެފިއެވެ.

ވަޒީފާގެ އެއްބަސްވުމުގައިވާގޮތަށް ޢަމަލު ކުރުމަކީ އިސްލާމީ ޝަރީޢަތުގައި އަޙުދަށް ރައްކާތެރިވުމުގެ ތެރޭގައި ހިމެނޭކަމެއް ކަމަށާއި، އެހެންކަމުން ވަޒީފާގެ ބަޔާނަކީ އޮފީހުގެ ވަތްގަނޑުގައި ބާއްވާލުމަށް ކުރަހައިލެވޭ ތަޞްވީރެއް ނޫންކަމަށް ޚުޠުބާގައި ބުނެފައިވެއެވެ. އެހެންކަމުން، އެ ބަޔާނުގައި ލިޔެފައިވާ ކޮންމެ ލަފުޒަކަށާއި ޖުމްލައަކަށް ފަރުވާތެރިވުމަށާއި، ވަޒީފާގެ ތެރެއިން ޚިދުމަތަށް އެދޭ ފަރާތްތަކަށް ފަރުވާތެރިކަމާއެކު އެ ޚިދުމަތެއް ވީއެންމެ ފުރިހަމައަކަށް، އިޙްތިރާމާއި އޯގާތެރިކަމާއެކު، މުވައްޒަފުން ފަހަތުން ޚިދުމަތް ހޯދާ މީހާ ދުވަން ނުޖެހޭގޮތަށް ފޯރުކޮށްދެން ޖެހޭނެކަމަށް ވެސް ޚުޠުބާގައި ބުނެފައިވެއެވެ.

އަދި ވަޒީފާގެ އަޙުދަށް ރައްކާތެރިވުމަކީ، އޮފީހުގެ ކަރަންޓާ، ފެނާ، ފޯނާ، ކަރުދާހާ، ދެއްޔާ، މެޝިނަރީއަށް ވެސް އަމާނާތެރިވުމެވެ. މީގެ އިތުރުން، އޮފީހުގެ މަސައްކަތަށް ކަނޑައެޅިފައިވާ ވަގުތާއި، މަސައްކަތާ ގުޅޭ ސިއްރު ހިފެހެއްޓުމަކީ ވެސް އަމާނާތެއްކަމަށް ޚުޠުބާގައި ބުނެފައިވެއެވެ.

އެހެންކަމުން، އޮފީހުގެ ރަސްމީ ވަގުތުގައި އޮފީހުން ބޭރުގައި ހޭދަ ނުކުރުމަށާއި، އޮފީހުގެ ތަކެތި ނަހަމަ ގޮތުގައި ބޭނުން ނުކުރުމަށް ޚުޠުބާގައި އިލްތިމާސްކޮށްފައި ވެއެވެ. އަދި އޮފީހުގެ ސިއްރުތައް މީސްމީޑިއާގައި ފަތުރާއިރު އެއީ ފަހުން ހިތާމަކުރަންޖެހޭނެ ކަމެއްކަން ދަންނަންވާނެކަމަށް ވެސް ބުނެފައިވެއެވެ.

އަމާނާތްތެރިކަން ނެތް މީހާގެ ކިބައިގައި، ފުރިހަމަ އީމާންކަމެއް ނުވެއެވެ. އަދި އަޙުދަށް ވަފާތެރިނުވާ މީހާގެ ކިބައިގައި ފުރިހަމަ ދީންވެރިކަމެއް ނުވެއެވެ.

އަމާނާތްތެރިކަމާ ގުޅިގެން މާތް ނަބިއްޔާ ޙަދީޘްކުރެއްވި ބަސްފުޅެއްގެ މާނައިގައި ވެއެވެ.

ޚުޠުބާގައި ފާހަގަކޮށްފައިވާ ގޮތުން، މުވައްޒަފުންނަކީ މުޖުތަމަޢުގައި ހިމެނޭ ގިންތިތަކުގެ ތެރެއިން މަތިވެރި ސްލޫކުން އެންމެ ފުރިހަމައަށް ޒީނަތްތެރިވާންޖެހޭ ބައެއް ކަމަށާއި، ވަޒީފާގެ މައިދާނުގައި ރިވެތި ސިފަތައް ފެންނަން ޖެހޭނެ ބައެކެވެ. 

މިކަމަށް އަލިއަޅުވާލައި ޚުޠުބާގައި ފާހަގަކޮށްފައިވާ ގޮތުން، ވަޒީފާގެ ވެށި އަމާން ވެއްޓަކަށް ހެދުމަކީ ކޮންމެ މުވައްޒަފެއްގެ ވެސް ވާޖިބެކެވެ. އެގޮތުން މަސައްކަތުގެ ރޫޙު ގެއްލޭ ގޮތަށް އެއްވެސް ކަމެއް އަދި ވާހަކައެއް ވެސް ދައްކައިގެން ނުވާނެއެވެ. 

މީގެ އަނެއްކޮޅުން، ވަޒީފާދޭ ފަރާތުގެ މައްޗަށް އޮތް ވާޖިބުތަކަށް ވެސް ޚުޠުބާގައި އަލިއަޅުވާލާފައިވެއެވެ. އެގޮތުން، ވަޒީފާގެ މާހައުލުގައި މުވައްޒަފުންގެ ސަލާމަތާއި ރައްކާތެރިކަމަށް ސަމާލުކަން ދިނުމާއި، ކަނޑައަޅާފައިވާ މުސާރައާއި އިނާޔަތްތައް ޤަވާއިދުން ދިނުމާއި، ޗުއްޓީއާއި ހުސްވަގުތު ދީ، މުވައްޒަފުންގެ މެދުގައި ޢަދުލުއިންޞާފު ޤާއިމުކުރުމުގެ މުހިންމުކަން ފާހަގަކޮށްފައިވެއެވެ.