ޚަބަރު
ސަފާރީއަކުން މޫދަށް ވެއްޓުނު ދިވެއްސަކު ގެއްލިގެން ހޯދަނީ
ސަފާރީއިން ވެއްޓިގެން ހޯދަމުންދާ ޢަލީ އަރުޝަދު
ހުލާސާ
ނޯތު-7 ނަމަކަށް ކިޔާ ސަފާރީގައި ހުރި މި މީހާ ވެއްޓުނު އިރު، އެ ސަފާރީ އޮތީ އދ. އަތޮޅުގެ މިރިހި އައިލެންޑް ރިޒޯޓުގެ ކައިރީގައި.
ބުރާސްފަތި ދުވަހެގެރޭގެ ވަގުތެއްގައި ސަފާރީއަކުން މޫދަށް ވެއްޓުނު ދިވެއްސަކު ގެއްލިގެން އޭނާ ހޯދުމުގެ މަސައްކަތް ފަށައިފިއެވެ.
ނޯތު-7 ނަމަކަށް ކިޔާ ސަފާރީގައި ހުރި މި މީހާ ވެއްޓުނު އިރު، އެ ސަފާރީ އޮތީ އދ. އަތޮޅުގެ މިރިހި އައިލެންޑް ރިޒޯޓުގެ ކައިރީގައިކަމަށް، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވަނީ ހާމަކޮށްފައެވެ.
ގެއްލުނު މީހަކީ ނ އަތޮޅު ހޮޅުދޫއަށް ނިސްބަތްވާ އެ ރަށު ސީވީޑް ޢަލީ އަރުޝަދު، 35 އަހަރު، އެވެ.
އޭނާ ސަފާރީއިން މޫދަށް ވެއްޓުނީ، ސަފާރީގެ ޑެކް މަތީގައި ހުއްޓައެވެ. އަދި މޫދަށް ވެއްޓުމުގެ ކުރިން ސަފާރީގެ އަރިމަތީގައި ޖެހިފައިވާ މަންޒަރު، އެ ސަފާރީގެ ސީސީޓީވީ ފޫޓޭޖުން ފެންނަކަމަށް ފުލުހުން ވަނީ ހާމަކޮށްފައެވެ.
މި މީހާ ހޯދުމުގެ މަސައްކަތް، ފުލުހުންނާއި ސިފައިން ގުޅިގެން މިހާރު އަންނަނީ ކުރަމުންނެވެ. މި އޮޕަރޭޝަނުގައި ހަރަކާތްތެރިވުމަށް ގޮސްފައިވަނީ މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއެވެ.
