ޚަބަރު
ސަފާރީން މޫދަށް ވެއްޓުނު މީހާ މަރުވެފައި އޮއްވާ ފެނިއްޖެ

ސަފާރީއިން ވެއްޓުނު ޢަލީ އަރުޝަދު
ހުލާސާ
އެމީހާގެ ހަށިގަނޑު ފެނިފައިވަނީ މެންދުރުފަހު 14:40 ހާއިރު.
އޭނާ ސަފާރީން ވެއްޓެން މެދުވެރިވި ސަބަބެއް އަދި ފުލުހުން ހާމަކޮށްފައެއް ނުވޭ.
ނޯތު-7 ނަމަކަށް ކިޔާ ސަފާރީން މޫދަށް ވެއްޓި ގެއްލިގެން ހޯދަމުންދިޔަ މީހާގެ ހަށިގަނޑު މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފުން ހޯދައިފިއެވެ.
ނ އަތޮޅު ހޮޅުދޫއަށް ނިސްބަތްވާ އެ ރަށު ސީވީޑް ޢަލީ އަރުޝަދު، 35 އަހަރު، ގެއްލުނުއިރު ސަފާރީ އޮތީ އދ. އަތޮޅުގެ މިރިހި އައިލެންޑް ރިޒޯޓުގެ ކައިރީގައެވެ.
އޭނާ ސަފާރީއިން ރޭގެ ވަގުތެއްގައި މޫދަށް ވެއްޓުނީ، ސަފާރީގެ ޑެކް މަތީގައި ހުއްޓައެވެ. އަދި މޫދަށް ވެއްޓުމުގެ ކުރިން ސަފާރީގެ އަރިމަތީގައި ޖެހިފައިވާ މަންޒަރު، އެ ސަފާރީގެ ސީސީޓީވީ ފޫޓޭޖުން ފެންނަކަމަށް ފުލުހުން ވަނީ ހާމަކޮށްފައެވެ.
އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޮމާންޑް ސެންޓަރަށް މިއަދު ހެނދުނު 7:30 ހާއިރު އެ ރިޕޯޓު ލިބުމާ ގުޅިގެން، އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންގެ ޑައިވަރުންނަށް އެ ސަރަޙައްދަށް ގޮސް ރެސްކިއު އޮޕަރޭޝަން ފެށިވަނީ މެންދުރުފަހު 13:30 ގައެވެ.
އަދި އެ ޓީމަށް އެމީހާގެ ހަށިގަނޑު ފެނިފައިވަނީ މެންދުރުފަހު 14:40 ހާއިރުއެވެ. އެމްއެންޑީއެފްއިން މަޢުލޫމާތުދީފައިވާ ގޮތުގައި، އެމީހާގެ ހަށިގަނޑު ލޯންޗަށް ނެގުނީ 15:35ގައެވެ.
މަރުވެފައި އޮތް އަރުޝަދުގެ ހަށިގަނޑު މިހާރު ފެނިފައިވީނަމަވެސް، އޭނާ ސަފާރީން ވެއްޓެން މެދުވެރިވި ސަބަބެއް އަދި ފުލުހުން ހާމަކޮށްފައެއް ނުވެއެވެ.