މާލޭގެ ވިއްސާރައިގައި އެމްއެންޑީއެފްގެ އެހީތެރިކަން 58 ގެއަކަށް - 13,882 ޓަނުގެ ފެން ހިންދައިފި

މާލެއަށް ކުރަމުންދާ ވިއްސާރައާ ގުޅިގެން، އެމްއެންޑީއެފް މާލޭ އޭރިއާ ކޮމާންޑުން ކުރިއަށްގެންދާ އޮޕަރޭޝަންގައި މިހާތަނަށް 58 ގެއަކަށް އެހީތެރިކަން ފޯރުކޮށްދީފިއެވެ. މި މަޢުލޫމާތު ހާމަކޮށްދެއްވީ އެމްއެންޑީއެފްގެ ފަރާތުންނެވެ.

ބޯކޮށް ވެހުނު ވާރޭއާ ގުޅިގެން މާލޭގެ ބައެއް މަގުތަކުގައި ފެންބޮޑުވެފައިވާތީ، ފެން ހިންދުމުގެ މަސައްކަތުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ދަނީ ހަރަކާތްތެރިވަމުންނެވެ. މިގޮތުން، މާލޭގެ 8 ސަރަހައްދެއްގައި 23 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރިއެވެ.

އެމްއެންޑީއެފްގެ ފަރާތުން ދެއްވި މަޢުލޫމާތުގައިވާ ގޮތުން، މިހާތަނަށް 13,882 ޓަނުގެ ފެން ވަނީ ހިންދާފައެވެ. 

މޫސުމަށް އައިސްފައިވާ ބަދަލާ ގުޅިގެން، އާންމު ރައްޔިތުންނަށް ދިމާވެދާނެ ދަތިތަކުން ސަލާމަތްވުމަށް ސަމާލުވުމަށް ސަރުކާރުގެ ކަމާބެހޭ އިދާރާތަކުން އިލްތިމާސްކޮށްފައިވެއެވެ. އަދި ކުއްލި ހާލަތެއްގައި އެހީތެރިކަމަށް އެދޭނަމަ 119 ނަންބަރަށް ގުޅުމަށް އަންގާފައިވެއެވެ.