ދުނިޔެ
ކުޑަކުއްޖަކަށް ދޫނި ރޯގާ ޖެހުމުން އެމެރިކާގައި ކަންބޮޑުވުން އިތުރުވެއްޖެ

ދޫނިރޯގާ ފޮޓޯ:އިންޓަނެޓް
އެމެރިކާގެ ޓެކްސަސް ސްޓޭޓްގައި ކުޑަކުއްޖަކަށް ދޫނި ރޯގާ (ބަރޑް ފްލޫ) ޖެހިފައިވާކަން ދެނެގަނެވިފައިވާކަމަށް އެ ޤައުމުގެ ސިއްޙީ އިދާރާތަކުން ހާމަކޮށްފިއެވެ. މިއީ އާންމު ބަލި ދެނެގަތުމުގެ ނިޒާމުގެ ތެރެއިން ފާހަގަކުރެވުނު ކޭހެއް ކަމަށް ބުނެއެވެ.
މި ކުއްޖާއަށް ބަލީގެ އަލާމާތްތައް ފެނުމާ ގުޅިގެން، އާރް.އެސް.ވީ، ކޮވިޑް-19 އަދި އިންފްލުއެންޒާގެ ޓެސްޓުތައް ހަދާފައިވެއެވެ. މި ޓެސްޓުތަކުން އިންފްލުއެންޒާ އޭ ޕޮޒިޓިވްވެފައިވާކަން ފާހަގަކުރެވުނެވެ. އެމެރިކާގެ އެކި ސަރަޙައްދުތަކުގައި ހުރި ލެބޯޓަރީތަކުން އިންފްލުއެންޒާ އޭގެ ހުރިހާ ވައިރަސްތަކެއްގެ ސީކުއެންސިންގ ހަދަމުންދާ ކަމަށާއި، މިއީ އެޗް5އެން1 އިންސާނުންގެ މެދުގައި ފެތުރެމުން ނުދާކަން ޔަޤީންކުރުމަށް އަޅާ ރައްކާތެރިކަމުގެ ފިޔަވަޅެއް ކަމަށް ބުނެއެވެ.
މި ކުއްޖާގެ ސާމްޕަލްގެ ސީކުއެންސިންގ ހެދުމުން އެއީ އެޗް5އެން1 ކަމަށް ދެނެގަނެވިފައިވާ ކަމަށާއި، އިތުރަށް ޔަޤީންކުރުމަށްޓަކައި މި ސާމްޕަލް އެމެރިކާގެ ބަލި ކޮންޓްރޯލް ކުރުމާއި ހުއްޓުވުމުގެ މަރުކަޒަށް (ސީ.ޑީ.ސީ) ފޮނުވާފައިވާ ކަމަށް ބުނެއެވެ.
މި ކުއްޖާއަށް ހޮސްޕިޓަލްގައި ފަރުވާ ދޭން ޖެހިފައި ނުވާ ކަމަށާއި، މިހާރު ވަނީ ރަނގަޅުވެފައި ކަމަށް ބުނެއެވެ. ނަމަވެސް މި ކުއްޖާއަށް މި ބަލި ޖެހުނު ގޮތެއް އަދި ނޭނގޭ ކަމަށާއި، މި ބަލި އެހެން މީހުންނަށް ފެތުރިފައިވާކަމުގެ ހެއްކެއް ނެތް ކަމަށް ބަލި ދެނެގަތުމުގެ މާހިރުން ބުނެއެވެ. އަދި އާންމު ރައްޔިތުންނަށް މި ބަލީގެ ނުރައްކާ ކުޑަކަމަށްވެސް ބުނެއެވެ.
އެމެރިކާގައި މިހާރު ހިނގަމުންދާ ބާޑް ފްލޫގެ ރޯގާގެ ސަބަބުން ވަނީ އިތުރު 66 މީހުންނަށް މި ބަލި ޖެހިފައެވެ. މި ބަލި ވައިލްޑް ލައިފް، ދޫނި އަދި ކިރުނެގުމަށް ބޭނުންކުރާ ގެރިތަކުގެ މެދުގައި ފެތުރެމުންދާ ކަމަށް ސީ.ޑީ.ސީ އިން ބުނެއެވެ.
ސިއްޙީ އިދާރާތަކުން އާންމުންނަށް އިލްތިމާސްކުރަނީ ރޯ ކިރު ނުބުއިމަށާއި، ރޯ ކިރުން އުފައްދާފައިވާ އުފެއްދުންތައް ނުކެއުމަށެވެ. އަދި ބަލި ޖެހިފައިވާ ނުވަތަ މަރުވެފައިވާ ދޫނިތަކާ ސީދާ ގުޅުން ނުބޭއްވުމަށްވެސް އިރުޝާދު ދެއެވެ. ބަލި ޖެހިފައިވާ ދޫންޏަކާ ދިމާވެއްޖެނަމަ ލޮލުގައި ރަތްކަމެއް އުފެދުން، ވަރުބަލިކަން، ހުން އައުން އަދި ބޮލުގައި ރިއްސުން ފަދަ އަލާމާތްތައް ފެނިއްޖެނަމަ ސިއްޙީ ހިތުމަތްތެރިންގެ އެހީތެރިކަން ހޯދުމަށް ވަނީ އަންގާފައެވެ.