ޖެޖޫ އެއަރ މަތިންދާބޯޓު ވެއްޓުނު ހާދިސާ ހިނގުމުގެ 4 މިނެޓު ކުރިން ބްލެކްބޮކްސް ރިކޯޑިންގ ވަނީ ހުއްޓިފަ

ތައިލެންޑުން ދެކުނު ކޮރެއާގެ މުއާން އަށް ދަތުރުކުރި ޖެޖޫ އެއަރގެ ބޯއިންގ 737-800 މަތިންދާބޯޓު ވެއްޓި 179 މީހުން މަރުވި ހާދިސާއާ ގުޅޭ މުހިންމު މަޢުލޫމާތެއް ދެކުނު ކޮރެއާގެ ޓްރާންސްޕޯޓް މިނިސްޓްރީން ހާމަކޮށްފިއެވެ. މިނިސްޓްރީން  ބުނީ ހާދިސާ ހިނގުމުގެ 4 މިނެޓު ކުރިން ބްލެކް ބޮކްސްތަކުގައިވާ ފްލައިޓް ޑޭޓާ އަދި ކޮކްޕިޓް ވޮއިސް ރެކޯޑަރުތައް ރެކޯޑު ކުރުން ހުއްޓާލާފައިވާ ކަމަށެވެ.

ޑިސެމްބަރު 29 ވަނަ ދުވަހު ހިނގި މި ހާދިސާގައި 181 ފަސިންޖަރުންނާއި ފަޅުވެރިން ތިބި މަތިންދާބޯޓު މުއާން އެއަރޕޯޓުގައި  ޖެހި، ރަންވޭގެ ކޮންކްރީޓް ހުރަހަކާ ޖެހި އަލިފާން ރޯވިއެވެ.ޓްރާންސްޕޯޓް މިނިސްޓްރީން ބުނީ ބޯޓު ލޮކަލައިޒަރާ ޖެހުމުގެ 4 މިނެޓު ކުރިން  ސީވީއާރު އަދި އެފްޑީއާރު ޑޭޓާ ރެކޯޑު ނުކުރާކަން ދައްކާ ކަމަށެވެ. އަދި މި ޑޭޓާ ގެއްލުނު ސަބަބު ބަލަމުންދާ ކަމަށް ވެސް ބުންޏެވެ.

ދެކުނު ކޮރެއާ އާއި އެމެރިކާގެ ތަޙުޤީޤު ފަރާތްތަކުން މި ހާދިސާގެ ސަބަބު ހޯދުމަށް މަސައްކަތް ކުރަމުންދެއެވެ. މިހާތަނަށް ބެލެވެނީ ދޫންޏެއް ޖެހުމާއި، ލޭންޑިންގ ގިއަރުގެ މައްސަލައެއް އަދި ރަންވޭގެ ހުރަސް ހާދިސާ ބޮޑުވުމަށް މެދުވެރިވި ކަމަށެވެ. ޕައިލެޓް ފުރަތަމަ ލޭންޑު ކުރަން އުޅުނު އިރު ދޫންޏެއް ޖެހުނު ކަމަށް އިންޒާރު ދިނުމަށްފަހު، ދެވަނަ ފަހަރަށް ލޭންޑު ކުރަން އުޅުނު އިރު ލޭންޑިންގ ގިއަރު ނުނެރެވި ހާދިސާ ހިނގާފައިވެއެވެ.

މި ހާދިސާއާ ގުޅިގެން ދެކުނު ކޮރެއާގައި ޤައުމީ ފެންވަރުގައި ހިތާމަ ފާޅުކޮށް، ޤައުމުގެ އެކި ކަންކޮޅުތަކުގައި ހަނދާނީ ތަންތަން ޤާއިމުކޮށްފައިވެއެވެ.