ޙައްޖަށް ދިއުމުގެ ފުރުޞަތު ލިބުނު މީހުންނަށް ދަޢުވަތު ފޮނުވަން ފަށައިފި

މިއަހަރު ރާއްޖެއިން ޙައްޖަށް  ދިއުމުގެ ފުރުޞަތު ލިބިފައިވާ މީހުންނަށް ޙައްޖުގެ ދަޢުވަތު ފޮނުވަން ފަށައިފިއެވެ. މި މަޢުލޫމާތު ހާމަކުރެއްވީ ޙައްޖު ކޯޕަރޭޝަންގެ މެނޭޖިންގ ޑިރެކްޓަރ އަޙްމަދު ޝަކީލެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ޝަކީލް ވިދާޅުވީ، ޙައްޖަށް ދިއުމުގެ ފުރުޞަތު ލިބުނު ކަމުގެ ދަޢުވަތު ފޮނުވަމުން ދަނީ ޙައްޖު ކިއު ތަރުތީބުން ކަމަށެވެ. އަދި އޭގެ ތެރެއިން ބައެއް މީހުން އެކި ސަބަބުތަކާ ހުރެ މިއަހަރު ނުދެވޭނެ ކަމަށް އަންގާފައިވާ ކަމަށާއި، އެ ޖާގަތަކަށްވެސް ކިއު ތަރުތީބުން މީހުންނަށް ފުރުޞަތު ދެމުންދާ ކަމަށް އޭނާ ވިދާޅުވިއެވެ.

މީގެ އިތުރުން، މިދިޔަ އަހަރުގެ ޙައްޖުގެ މަޝާޢިރުގައި ފާހަގަކުރެވިފައިވާ ކަންކަމަށް ބެލުމަށްފަހު ރަނގަޅު ކުރަންޖެހޭ ކަންކަން ރަނގަޅު ކުރުމަށް މަސައްކަތް ކުރަމުން އަންނަ ކަމަށް ޝަކީލް ވިދާޅުވިއެވެ. އެގޮތުން މިމަހުގެ 13 އިން 16 އަށް ސަޢުދީ އަރަބިއްޔާގެ ޖިއްދާގައި ކުރިއަށްދާ ޙައްޖު ކޮންފަރެންސްގެ ތެރެއިން މުތައްވިފުންނާ ބައްދަލުކޮށް އެކި ކަންކަމާ ގުޅޭގޮތުން ވާހަކަ ދައްކާނެ ކަމަށްވެސް އޭނާ ފާހަގަކުރެއްވިއެވެ.

ޝަކީލް އިތުރަށް ވިދާޅުވީ، މިއަހަރު ޙައްޖަށް މީހުން ގެންދިއުމަށް އިދާރީ ގޮތުން ވާންޖެހޭ ތައްޔާރީތައް މިހާރުވެސް ވާން ފަށާފައިވާ ކަމަށެވެ. އެގޮތުން ޙައްޖު ކޯޕަރޭޝަނާއި އިސްލާމީ ކަންތައްތަކާ ބެހޭ ވުޒާރާއިން ގުޅިގެން މަސައްކަތް ކުރަމުން އަންނަ ކަމަށް އޭނާ ފާހަގަކުރެއްވިއެވެ.

ކޮންމެ އަހަރެއްގައިވެސް ސަޢުދީ އަރަބިއްޔާއިން ރާއްޖެއަށް 1,000 ކޯޓާ ދޫކުރާއިރު، މިއަހަރު ސަރުކާރުން ނިންމަވާފައިވަނީ މި ކޯޓާގައި ޙައްޖަށް މީހުން ގެންދާނީ ހަމައެކަނި ޙައްޖު ކޯޕަރޭޝަނުން ކަމަށެވެ. އަދި ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް 50 ފަޤީރުން ޙައްޖަށް ފޮނުވުމަށްވެސް ނިންމަވާފައިވެއެވެ.

މިވަގުތު ޙައްޖު ކޯޕަރޭޝަން މެދުވެރިކޮށް ޙައްޖުގެ އަޅުކަން އަދާކުރުމަށް ކިއުގައި 9,115 މީހުން ތިބިކަމަށް އެ ކޯޕަރޭޝަނުން މަޢުލޫމާތު ދެއެވެ. މީގެ ތެރޭގައި 65 އަހަރުން ދަށުގެ 7,543 މީހުންނާއި، 65 އަހަރާއި 75 އަހަރާ ދެމެދުގެ 1,461 މީހުން، އަދި 75 އަހަރުން މަތީގެ 111 މީހުން ހިމެނެއެވެ.