ޓްރަމްޕްގެ ދެވަނަ ދައުރުގެ އިންތިޒާމު ފަންޑަށް އެމެރިކާގެ ބޮޑެތި ކުންފުނިތަކުން މިލިއަން ޑޮލަރު ހަދިޔާކުރަނީ

އެމެރިކާގެ ރައީސް ކަމަށް އަލުން އިންތިޚާބުވި ޑޮނަލްޑް ޓްރަމްޕްގެ ދެވަނަ ދައުރުގެ އިންތިޒާމު ފަންޑަށް އެ ގައުމުގެ ބޮޑެތި ކުންފުނިތަކުން މިލިއަން ޑޮލަރު ހަދިޔާކުރަމުންދާ ކަމަށް ބީބީސީ ނިއުސްއިން ހާމަކޮށްފިއެވެ.

މި ގޮތުން އެމެރިކާގެ މަތިންދާބޯޓު އުފައްދާ ބޮއިންގ އިން އެއް މިލިއަން ޑޮލަރު (812،600 ޕައުންޑް) ހަދިޔާކުރާ ކަމަށް އެ ކުންފުނިން ބީބީސީއަށް މައުލޫމާތު ދީފައިވެއެވެ. މީގެ އިތުރުން ގޫގުލް އަދި މައިކްރޯސޮފްޓް އިން ވެސް މިފަދަ ހަދިޔާއެއް ދޭ ކަމަށް ކަށަވަރުކޮށްދީފައިވެއެވެ.

މި ފަންޑަށް ހަދިޔާކުރާ އެހެން ބޮޑެތި ކުންފުނިތަކުގެ ތެރޭގައި ޗެވްރަން، މެޓާ، އެމެޒޯން އަދި އުބަރ ހިމެނެއެވެ. މީގެ އިތުރުން ކާރު އުފައްދާ ފޯޑް، ޖެނެރަލް މޯޓަރސް އަދި ޓޮޔޯޓާ އިން ވެސް ކޮންމެ ކުންފުންޏަކުން އެއް މިލިއަން ޑޮލަރު ހަދިޔާކޮށްފައިވެއެވެ.

ޓްރަމްޕްގެ ދެވަނަ ދައުރުގެ އިންތިޒާމު ފެށުމުގެ ރަސްމިއްޔާތު އޮންނާނީ މިއަހަރުގެ ޖެނުއަރީ 20 ވަނަ ދުވަހުއެވެ. ބޮއިންގ އިން ބުނެފައިވަނީ މިއީ އެމެރިކާގެ ރައީސުންގެ އިންތިޒާމު ފަންޑަށް އެހީތެރިވުމުގެ ގޮތުން އެ ކުންފުނިން ކުރަމުން އަންނަ ކަމެއް ކަމަށެވެ. އަދި ވޭތުވެދިޔަ ތިން ރައީސުންގެ އިންތިޒާމު ފަންޑަށް ވެސް މިފަދަ ހަދިޔާއެއް ދީފައިވާ ކަމަށް ބުނެފައިވެއެވެ.

ގޫގުލް އިން ބުނެފައިވަނީ މި ރަސްމިއްޔާތު ދުނިޔޭގެ އެކި ކަންކޮޅުތަކަށް ލައިވްކޮށް ދައްކާނެ ކަމަށެވެ. އަދި ގޫގުލްގެ ހޯމްޕޭޖުގައި ވެސް މި ރަސްމިއްޔާތު ބެލޭނެ ލިންކެއް ހިމަނާނެ ކަމަށް ބުނެފައިވެއެވެ.