ރޯދަމަހަށް ކޮންމެ ގެއަކަށް 48 މަސްދަޅުގެ ކޭހެއް ދޫކުރަނީ

ރާއްޖޭގެ މަސް އުފައްދާ ކުންފުނި މިފްކޯއިން މިއަދު ހާމަކުރި ގޮތުގައި، ކުރިއަށް އޮތް ރަމަޟާން މަހަށް ސަރުކާރުން ދޭ އިނާޔަތެއްގެ ގޮތުން ކޮންމެ ގޭބީސީއަކަށް 48 ދަޅުގެ މަސް ކޭހެއް ދޫކުރަން ނިންމާފައިވެއެވެ.

މިއީ ރައީސް ޑރ. މުޙައްމަދު މުޢިއްޒު މިދިޔަ އަހަރުގެ ނޮވެމްބަރު މަހު ވެވަޑައިގެންފައިވާ ވަޢުދެއް ފުއްދުމުގެ ގޮތުން އަޅާ ފިޔަވަޅެކެވެ. މިފްކޯއިން މަޢުލޫމާތު ދެއްވި ގޮތުގައި، މި ޕްރޮގްރާމަށް ތައްޔާރުވުމުގެ ގޮތުން އާންމުކޮށް އުފައްދާ މަސްދަޅުގެ އަދަދަށްވުރެ އިތުރު ލައްކައެއްހާ މަސްދަޅު އުފެއްދުމަށް ވަނީ ރޭވިފައެވެ.

މި ޕްރޮގްރާމުގެ ދަށުން ކޮންމެ ގެއަކަށް 48 ދަޅުގެ ތެޔޮ މަސްދަޅު ކޭހެއް ދޫކުރުމަށް ވަނީ ނިންމާފައެވެ. މިއީ މިދިޔަ އަހަރު ރޯދަމަހު 82،000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދިނުމަށްފަހު، މި އަހަރު ގެންނަ ބަދަލެކެވެ.

މާކެޓް ރޭޓަށް ބަލާއިރު، 82،000 ގޭބީސީއަށް މަސްދަޅު ކޭސް ދޫކުރުމަށް ގާތްގަނޑަކަށް 46 މިލިއަން ރުފިޔާ ޚަރަދުވާނެ ކަމަށް ލަފާކުރެވެއެވެ. މިފްކޯއިން ބުނެފައިވަނީ މި ޕްރޮޑަކްޝަނަކީ އެސްޓީއޯއާ ގުޅިގެން ކުރިއަށް ގެންދާ މަސައްކަތެއް ކަމަށެވެ.

މިފްކޯއިން އިތުރަށް މަޢުލޫށް މަޢުލޫމާތު ދެއްވި ގޮތުގައި، އަންނަ މަހުގެ ތެރޭގައި މި ޕްރޮޑަކްޝަން ނިމި، ގޭބީސީތަކަށް މަސް ކޭސްތައް ދޫކުރެވޭނެއެވެ. މަސްދަޅު ކޭސްތައް ދޫކުރާނެ ގޮތްތައް މިހާރު ރޭވެމުންދާ ކަމަށްވެސް އެ ކުންފުނިން ވަނީ ހާމަކޮށްފައެވެ.

މި ޕްރޮގްރާމަކީ ރައްޔިތުންނަށް ރޯދަމަހުގެ ޚަރަދުތަކުން ލުޔެއް ހޯދައިދިނުމަށް ސަރުކާރުން އަޅާ ފިޔަވަޅެއްގެ ގޮތުގައި ބެލެވެއެވެ.