ރާއްޖެ އައި މި އަހަރުގެ ފުރަތަމަ ކްރޫޒްލައިނާއިން 632 މީހަކަށް ކްލިއަރެންސް ދީފި

ދިވެހިރާއްޖެއަށް މި އަހަރު އައި ފުރަތަމަ ކްރޫޒްލައިނާއިން 632 މީހަކަށް ކްލިއަރެންސް ދީފައިވާ ކަމަށް މޯލްޑިވްސް އިމިގްރޭޝަނުން އިއްޔެ ހާމަކޮށްފިއެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނެފައިވަނީ، މި ބޯޓުން ރާއްޖެ އައި 216 ފަސިންޖަރުންނާއި 416 ކްރޫ މެންބަރުންނަށް ސީޕޯޓް ޑިވިޝަނުން ކްލިއަރެންސް ދީފައިވާ ކަމަށެވެ. އަދި މި ބޯޓު ރާއްޖެ އައީ ސިޝެލްސްއިން ފުރައިގެން ކަމަށްވެސް އިމިގްރޭޝަނުން ފާހަގަކޮށްފައިވެއެވެ.

The Seaport Division officers successfully provided en-route clearance services for 216 passengers and 416 crew members aboard Crystal Symphony, the first cruise liner to arrive this year, as it travelled from the Seychelles to the Maldives yesterday. pic.twitter.com/y3MJWHtKKz

— Maldives Immigration (@ImmigrationMV) January 10, 2025

މި އަހަރު ރާއްޖެ އައި ފުރަތަމަ ކްރޫޒްލައިނާއަކީ ބަހާމަސްގައި ރަޖިސްޓަރީ ކޮށްފައިވާ "ކްރިސްޓަލް ސިންފަނީ" އެވެ. މި ބޯޓު މާލެ ކައިރީގައި އިއްޔެ މަޑުކުރުމަށްފަހު، މިއަދު ހެނދުނު ވަނީ ސްރީ ލަންކާއަށް ދިއުމަށް ފުރައިފައެވެ.

އާ އަހަރާ ދިމާކޮށް، މިދިޔަ މަހުގެ ފަހުކޮޅުގައިވެސް ބޭރުގެ ބޮޑު ދެ ކްރޫޒްލައިނާއަކުން ގިނަ އަދަދެއްގެ ޓޫރިސްޓުން ރާއްޖެ އައިސްފައިވެއެވެ. މިގޮތުން މާޝަލް އައިލެންޑްސްގައި ރަޖިސްޓަރީ ކޮށްފައިވާ "އޯޝޭނިއާ ރިވިއާރާ" އާއި ބަހާމަސްގައި ރަޖިސްޓަރީ ކޮށްފައިވާ "ނޯވިއަން ސްކައި" ރާއްޖެ އައިސްފައިވާކަން ފާހަގަކުރެވެއެވެ.

އާ އަހަރު ފެށުމާއެކު ރާއްޖޭގެ ފަތުރުވެރިކަމުގެ ދާއިރާއަށް ކްރޫޒްލައިނާތަކުން ޒިޔާރަތްކުރާ ފަތުރުވެރިންގެ އަދަދު އިތުރުވަމުންދެއެވެ.