ކުޅިވަރު
އޭޝިއަން ކަޕަށް ތައްޔާރުވުމަށް ރާއްޖެއާ އިންޑިއާއާ ދެމެދު މެޗެއް ކުޅެނީ

2021 ގައި އޮތް ސާފް ޗެމްޕިއަންޝިޕްގައި އިންޑިއާ އާއި ދިވެހިރާއްޖެ ބައްދަލުކުރި މެޗުގެ ތެރެއިން، ފޮޓޯ: މިހާރު

ފަރުދުން
12 ޖެނުއަރީ 2025، 08:32
12 ޖެނުއަރީ 2025، 08:32
ހުލާސާ
އެންމެ ފަހުން އިންޑިއާއާ ދެކޮޅަށް ކުޅުނު އިންޑިއާއިން ކާމިޔާބުކުރީ 3-1 އިން.
މި އަންނަ މާޗު މަހު ފެށުމަށް ހަމަޖެހިފައިވާ އޭޝިއަން ކަޕް ކޮލިފައިންއަށް ތައްޔާރުވުމުގެ ގޮތުން، ދިވެހިރާއްޖޭގެ ޤައުމީ ފުޓުބޯޅަ ޓީމާއި އިންޑިއާގެ ޤައުމީ ޓީމު ފުރިތަކުރުމުގެ މެޗެއް ކުޅުމަށް ހަމަޖެހިއްޖެއެވެ.
އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް)އާ ހަވާލާދީ އިންޑިއާގެ ނޫސްތަކުން ހާމަކޮށްފައިވާ ގޮތުގައި، އިންޑިއާގެ ޤައުމީ ފުޓުބޯޅަ ޓީމުން އޭޝިއަން ކަޕަށް ތައްޔާރުވުމުގެ ގޮތުން ރާއްޖެއާ ދެމެދު އެކުވެރިކަމުގެ މެޗެއް ކުޅުމަށް ވަނީ ހަމަޖެހިފައެވެ.
އަދި މިކަމާ ގުޅިގެން އެފްއޭއެމްގެ ޖެނެރަލް ސެކްރެޓަރީ، ނާހިލް ސިއްދީގު "އަދަދު ސްޕޯޓްސް" އަށް މަޢުލޫމާތު ދެމުން ބުނެފައިވަނީ، މި މެޗުގެ މަޝްވަރާތައް ކުރެވެމުން އަންނަ ކަމަށެވެ. އަދި މެޗު ކުޅެވޭނެ ތާރީޙެއްގެ ގޮތުގައި ލަފާކޮށްފައިވަނީ މާޗު މަހުގެ 19 ނޫނީ 20 ވަނަ ދުވަހެވެ.
ނަމަވެސް އެ ތާރީޙު މި އަހަރުގެ ރަމަޟާން މަހާ ދިމާވާއިރު، މި މެޗު ވެގެން ދާނީ ޤައުމީ ޓީމު މި އަހަރު ކުޅޭ ފުރަތަމަ މެޗަށެވެ.
އެންމެ ފަހުން އިންޑިއާއާ ދެކޮޅަށް ކުޅުނު މެޗުން ރާއްޖެ ވަނީ ބަލިވެފައެވެ. 2021 ވަނަ އަހަރު އޮތް ސާފް ޗެމްޕިއަންޝިޕްގައި ކުޅުނު މި މެޗު އިންޑިއާއިން ކާމިޔާބުކުރީ 3-1 އިންނެވެ. އެ މެޗު ކުޅެފައިވަނީ ގަލޮޅު ދަނޑުގައެވެ.
ރާއްޖޭގެ ޤައުމީ ޓީމު މިދިޔަ އަހަރު ކުޅެފައިވަނީ ދެ މެޗެވެ. އެއީ މެޗެއް ނުކުޅެ އަހަރެއްހާ ދުވަސް ހޭދަވުމަށްފަހު ރާއްޖޭގެ ޓީމުން ކުޅުނު މެޗުތަކެކެވެ. ބަނގުލަދޭޝްގައި ކުޅުނު މި ދެ މެޗުގެ ތެރެއިން ފުރަތަމަ މެޗުން ރާއްޖެ މޮޅުވިއިރު، ދެވަނަ މެޗުން މޮޅުވީ ބަނދުލަދޭޝްއެވެ.
މި މަހުގެ ކުރީކޮޅު އިންޑިއާގެ އަންހެން ޤައުމީ ފުޓުބޯޅަ ޓީމާއެކު ރާއްޖޭގެ އަންހެން ޤައުމީ ޓީމު ވެސް ވަނީ އެކުވެރިކަމުގެ ދެ މެޗު ކުޅެފައެވެ.