މާފަންނު ސަހަރާގެ ފެން ހިންދާ ޕަމްޕު ސްޓޭޝަން ވަގުތީގޮތުން މަރާމާތުކޮށްފި

މާފަންނު ސަހަރާގައި ހުރި ފެން ހިންދާ  ޕަމްޕު ސްޓޭޝަން މަރާމާތުކޮށް ވަގުތީގޮތުން އޮޕަރޭޝަނަށް ގެނެވިއްޖެއެވެ. މިކަން ހާމަކުރެއްވީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބެވެ.

މިކަމާ ގުޅޭގޮތުން އެ ވުޒާރާއިން ނެރުނު ނޫސްބަޔާނެއްގައި ބުނެފައިވަނީ، މާފަންނު ސަހަރާގައި ހުރި ފެން ހިންދާ ޕަންޕު ސްޓޭޝަން ހަލާކުވުމާ ގުޅިގެން ނެޓްވޯކްތައް ޗެކުކޮށް، ރޯޑް ޑިވެލޮޕްމެންޓް ކޯޕަރޭޝަން ލިމިޓެޑާއި ސްޓެލްކޯގެ އެހީތެރިކަމާއެކު ވަގުތީގޮތުން އެ ޕަމްޕު ސްޓޭޝަން ބޭނުންކުރެވޭނެ ހާލަތަށް މިހާރު ގެނެވިފައިވާ ކަމަށެވެ.

މާލެއަށް ބޯކޮށް ވާރޭވެހުމުން ދިމާވާ ފެންބޮޑުވުމުގެ މައްސަލަތައް ޙައްލުކުރުމަށް ހަދާފައިވާ އެއް ސްޓޯމް ވޯޓަރ ޕަމްޕު ސްޓޭޝަން ހުންނަނީ މާފަންނު ސަހަރާ ހިމެނޭ ސަރަހައްދުގައެވެ. ނަމަވެސް، މާލެ ސިޓީ ކައުންސިލުން މާފަންނު ސަހަރާ ހުސްކުރުމުގެ މަސައްކަތް ހަވާލުކޮށްފައިވާ ކޮންޓްރެކްޓަރުގެ އިހުމާލުން އެތަނުގައި ހަދާފައިވާ ސްޓޯމް ވޯޓަރ ޕަމްޕު ސްޓޭޝަން ހަލާކުވެފައިވާކަން ވަޒީރު ހާމަކުރެއްވިއެވެ.

އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފައިވަނީ، މާފަންނު ސަހަރާގެ ބައެއް ހުސްކުރުމަށް މާލެ ސިޓީ ކައުންސިލުން ހަވާލުކޮށްފައިވާ ފަރާތުން އެ ވުޒާރާއަށް އެންގުމަކާ ނުލައި މަސައްކަތްކޮށްފައިވަނީ ޒިންމާދާރުކަން ކުޑަ ގޮތަކަށް ކަމަށެވެ. މިކަމާ ގުޅިގެން ވަޒީރު ވަނީ ކަންބޮޑުވުން ފާޅުކުރައްވާފައެވެ.

ވިއްސާރައިގެ ސަބަބުން މާލެ ސިޓީގައި ފެންބޮޑުވުމުގެ މައްސަލަ ދިމާވާ ކޮންމެ ފަހަރަކު އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މާލޭގެ އެކި ސަރަހައްދުތަކުގައި ޤާއިމުކުރެވިފައިވާ ފެން ހިންދާ ސްޓޭޝަންތައް އިންސްޕެކްޓްކޮށް، މި ސްޓޭޝަންތައް ރަނގަޅަށް މަސައްކަތްކުރޭތޯ ބަލަމުންދާކަން ފާހަގަކޮށްފައިވެއެވެ.