ދުނިޔެ
ކެލިފޯނިއާގެ އަލިފާނުގެ ހާދިސާގައި ޑްރޯނަކާ ޖެހި ފަޔަރ ފައިޓިންގ މަތިންދާބޯޓެއް ވެއްޓިއްޖެ

ޑްރޯންގައި ޖެހުނު ފަޔަރ ފައިޓިންގ މަތިންދާބޯޓު ފޮޓޯ:އޮންލައިން
ކެލިފޯނިއާގެ ޕެލިސޭޑްސް ސަރަހައްދުގައި ރޯވެފައިވާ އަލިފާނުގެ ހާދިސާގައި އަލިފާން ނިއްވުމަށް ބޭނުންކުރަމުންދިޔަ ކެނެޑާގެ "ސުޕަރ ސްކޫޕަރ" މަތިންދާބޯޓެއް ސިވިލް ޑްރޯނަކާ ޖެހި ވެއްޓިއްޖެއެވެ. މި ހާދިސާ ހިނގީ ބުރާސްފަތި ދުވަހުއެވެ.
އެފްބީއައިގެ ލޮސް އެންޖެލެސް ފީލްޑް އޮފީހުގެ އެސިސްޓެންޓް ޑިރެކްޓަރ އަކިލް ޑޭވިސް ވިދާޅުވި ގޮތުގައި މި ހާދިސާއާ ގުޅިގެން ޑްރޯން އޮޕަރޭޓްކުރި ފަރާތް ހޯދުމަށް އާންމުންގެ އެހީތެރިކަން ބޭނުންވެއެވެ. އޭނާ ވިދާޅުވީ މަތިންދާބޯޓުތައް ބޭނުންކޮށްގެން އަލިފާން ނިއްވުމަކީ އަލިފާނުގެ ހާދިސާތަކުގައި އެންމެ އެދެވޭ ގޮތް ކަމަށެވެ.
ޑްރޯންގައި ޖެހުމުގެ ސަބަބުން "ކިއުބެކް 1" ނަމަކަށް ކިޔާ މަތިންދާބޯޓުގެ ފިޔަގަނޑުގައި 3 އިންޗި ފުޅާ، 6 އިންޗި ދިގު ލޯވަޅެއް ހެދިފައިވާ ކަމަށް ޑޭވިސް ވިދާޅުވިއެވެ. އަލިފާނުގެ ހާދިސާ ހިނގަމުންދާ ސަރަހައްދުގައި ވަގުތީގޮތުން ވައިގެ ދަތުރުފަތުރު މަނާކޮށްފައިވާއިރު، އެ ސަރަހައްދުގައި ޑްރޯން އުދުއްސުމަކީ ފެޑެރަލް ޤާނޫނާ ޚިލާފު ކަމެއް ކަމަށްވެސް އޭނާ ވިދާޅުވިއެވެ.
އެފްބީއައިން ވަނީ މި ހާދިސާއާ ގުޅޭ މަޢުލޫމާތު ދެވޭނެ ފަރާތްތަކުން އެ އިދާރާއާ ގުޅުމަށް އެދިފައެވެ. މި ކުށަށް ޖޫރިމަނާ ނުވަތަ ޖަލު ޙުކުމް ނުވަތަ މި ދެކަމުގެ އަދަބު ކަނޑައެޅިދާނެ ކަމަށް ޑޭވިސް ވިދާޅުވިއެވެ.