ކުޅިވަރު
މެންޗެސްޓަރ ސިޓީ ދޫކޮށްލަން ބޭނުންވާކަމަށް ވޯކާރ ބުނެފި

ކައިލް ވޯކާރގެ ސޮއި ހޯދުމުގެ ކުރީގައި އުޅެނީ އޭސީ މިލާން، ފޮޓޯ: ގެޓީ އިމޭޖަސް
ހުލާސާ
ގާޑިއޯލާ ބުނީ، ވޯކާރގެ މަގާމަށް އެހެން ކުޅުންތެރިން ބޭނުންކުރަން ފެށީ، އޭނާގެ ސިކުނޑި އެ ޓީމު ދޫކޮށްލަން ބޭނުންވުމުން ކަމަށް.
މެންޗެސްޓަރ ސިޓީ ދޫކޮށްލަން ބޭނުންވާކަމަށް، އެ ޓީމަށް ކުޅެމުން އަންނަ އިނގިރޭސި ޑިފެންޑަރު، ކައިލް ވޯކާރ ބުނެފިއެވެ.
ވޯކާރ ޓީމު ދޫކޮށްލަން ބޭނުންވާކަމަށް ހާމަކޮށްފައިވާއިރު، އޭނާގެ އެއްބަސްވުމުގައި އަދި 18 މަސް ބާކީ އެބައޮތެވެ. އަދި ހޮނިހިރު ދުވަހު އެފްއޭ ކަޕްގައި ސަލްފޯޑުއާ ދެކޮޅަށް ކުޅުނު މެޗުގެ ސްކޮޑަށް ވެސް އޭނާ ނަގާފައެއް ނުވެއެވެ. މީގެ އިތުރުން، އެ މެޗު 8-0 އިން ކާމިޔާބުކުރުމަށްފަހު ސިޓީގެ ކޯޗު، ޕެޕް ގާޑިއޯލާ ބުނެފައިވާގޮތުގައި، ސިޓީ ދޫކޮށްލަން ބޭނުންވެގެން ވޯކާރ ވަނީ ޓީމުގެ ފުޓުބޯޅަ ޑައިރެކްޓަރ، ޒިކީ ބެގިރިސްޓޭންއާ ބައްދަލުކޮށް އެކަމާ މަޝްވަރާކޮށްފައެވެ.
ގާޑިއޯލާ ބުނީ، ވޯކާރއަކީ ޓީމުގައި މޮޅު ކުޅުމެއް ދައްކާފައިވާ ކުޅުންތެރިއެއް ކަމަށާއި، ނަމަވެސް އޭނާގެ ކެރިއަރުގެ ނިމޭކޮޅަށް އައިސްފައިވާއިރު، އޭނާ އެހެން ލީގެއްގައި ކުޅެން ބޭނުންވާކަމަށް ހިއްސާކޮށްފައިވާކަމަށެވެ. އަދި އޭނާގެ މަގާމަށް އެހެން ކުޅުންތެރިން ބޭނުންކުރަން ފެށީ، އޭނާގެ ސިކުނޑި އެ ޓީމު ދޫކޮށްލަން ބޭނުންވުމުން ކަމަށެވެ.
މި ފަހަކަށް އައިސް ވޯކާރގެ މަގާމުގައި ބޭނުންކޮށްފައިވަނީ ރިކޯ ލެވިސްއެވެ. ނަމަވެސް ވޯކާރ އެ ޓީމުން ގޮސްފިނަމަ، ސްކޮޑުގެ ވަރުގަދަކަން ހިފެހެއްޓުމަށް އައު ޑުފެންޑަރުން ގެނައުން ސިޓީއަށް މުހިންމުވާނެއެވެ.
"ދަ ޓެލެގްރާފް" އިން ހާމަކޮށްފައިވާ ގޮތުގައި، އޭސީ މިލާނުން ވަނީ ވޯކާރ އެ ޓީމަށް ގެންދިއުމުގެ ޝައުގުވެރިކަން ފާޅުކޮށްފައެވެ. ނަމަވެސް މިލާނުން އަދި ރަސްމީކޮށް ވޯކާރއަށް ބިޑްކޮށްފައެއް ނުވެއެވެ.
ވޯކާރ ސިޓީ ދޫކޮށްދިއުމުގެ ވާހަކަތައް ދެކެވެމުންދާއިރު، އެ ޓީމުގެ ޑިފެންސް އައު ކުރުމުގެ މަސައްކަތް ވެސް ވަނީ ފަށާފައެވެ. އެ ގޮތުން ސިޓީއިން ވަނީ 41 މިލިއަން ޑޮލަރުގެ ފީއަކަށް، ލެންސްގެ އުޒްބެކިސްތާނުގެ ޑިފެންޑަރ، އަބްދުކޯދިރް ޚުސާނޯވް ގެނައުމަށް އެއްބަސްވެފައެވެ. މީގެ އިތުރުން ބްރެޒިލްގެ ޑިފެންޑަރ، ވިޓޯ ރޭޒް ގެނައުމުގެ މަޝްވަރާތައް ވެސް ސިޓީއިން ވަނީ ފަށާފައެވެ.
އޭސީ މިލާންގެ އިތުރުން، ސައުދީ އަރަބިއްޔާގެ އަލް-ނަސްރުން ވެސް ވަނީ އޭނާ ގެންދިއުމުގެ ޝައުގުވެރިކަން ފާޅުކޮށްފައެވެ. އަދި ރިޕޯޓުތައް ބުނާ ގޮތުން، އަލް-ނަސްރުން ވޯކާރއަށް ހުށަހަޅާފައިވަނީ ހަފްތާއަކު ހަތަރު ލައްކަ ޕައުންޑުގެ މުސާރައެކެވެ.