ދުނިޔެ
ޣައްޒާގެ ސްކޫލްތަކަށް އިސްރާއީލުން ދެމުންދާ ހަމަލާތައް ދަނީ އިތުރުވަމުން

ޢައްޒާގައި ވަގުތީ ހިޔާގެ ގޮތުގައި ބޭނުންކުރާ ސްކޫލެއް ފޮޓޯ:އަލްޖަޒީރާ
ޣައްޒާގައި ހިނގަމުންދާ ހަނގުރާމައިގައި އިސްރާއީލުން ދެމުންދާ ހަމަލާތަކުގެ ތެރެއިން ގިނަ އަދަދެއްގެ ހަމަލާތައް އަމާޒުވަމުންދަނީ ސްކޫލްތަކަށެވެ. މި ސްކޫލްތަކަކީ ގެދޮރުގެއްލި ހިޖުރަކުރަން މަޖުބޫރުވެފައިވާ ފަލަސްތީނުގެ ރައްޔިތުން ވަގުތީ ހިޔާވަހިކަން ހޯދަމުންދާ ތަންތަނެވެ.
އދ. އާއި އެހީދޭ އޭޖެންސީތަކުން ބުނާ ގޮތުގައި 2023 ވަނަ އަހަރުގެ އޮކްޓޯބަރު 6 އިން ޑިސެމްބަރު 15 އާ ދެމެދު ޣައްޒާގެ ސްކޫލްތަކަށް މަދުވެގެން 95 ހަމަލާ ދީފައިވެއެވެ. މީގެ ތެރެއިން ގިނަ އަދަދެއްގެ ސްކޫލްތަކަކީ ހިޖުރަކުރި މީހުންނަށް ހިޔާވަހިކަން ދެމުންދިޔަ ތަންތަނެވެ. މި ހަމަލާތަކުގެ ތެރެއިން 61 ހަމަލާ ދީފައިވަނީ އުތުރު ޣައްޒާގައެވެ.
މި ރިޕޯޓު ނެރުމަށްފަހު، އިތުރު ތިން ހަމަލާ ސްކޫލްތަކަށް ދީފައިވެއެވެ. މީގެ ތެރޭގައި ހިމެނެނީ:
- ޑިސެމްބަރު 25 ގައި ޣައްޒާ ސިޓީގެ ޝައިޚް ރަދުވާން ސަރަހައްދުގައި ހުރި ސްކޫލެއްގައި ހިޔާވަހިކަން ހޯދަމުންދިޔަ މީހުންނަށް ދިން ހަމަލާއެއްގައި ކުޑަކުއްޖަކާއެކު 6 މީހުން މަރުވުން.
- ޑިސެމްބަރު 19 ގައި ޣައްޒާ ސިޓީގެ ތުއްފާހު ސަރަހައްދުގައި ހުރި ސްކޫލަކަށް ދިން ހަމަލާއެއްގައި އަންހެނުންނާއި ކުޑަކުދިން ހިމެނޭ ގޮތަށް 13 މީހުން މަރުވުން.
އދ. ގެ އިންސާނީ ޙައްޤުތަކާބެހޭ އޮފީހުން ބުނާ ގޮތުގައި މިފަދަ ހަމަލާތަކަކީ ބައިނަލްއަޤްވާމީ އިންސާނިއްޔަތުގެ ޤާނޫނާ ޚިލާފު ކަމެކެވެ. އަދި މިއީ އާންމު ރައްޔިތުންނަށް އަމާޒުކޮށް ދޭ ހަމަލާތަކެއް ކަމަށް ބެލެވިދާނެ ކަމަށް އެ އޮފީހުން ބުނެއެވެ.