އެންމެ ދުވަސްވީ އޭޓީޕީ ޓުއަރ ޗެމްޕިއަންގެ ޝަރަފު މޮންފިލްސްއަށް

ނިއުޒީލެންޑުގެ އޮކްލަންޑުގައި ކުޅުނު އޭއެސްބީ ކްލެސިކް ކާމިޔާބުކޮށް، އޭޓީޕީ ޓުއަރ ކާމިޔާބުކުރި އެންމެ ދުވަސްވީ ކުޅުންތެރިއާގެ ޝަރަފު، ފްރާންސްގެ ގޭލް މޮންފިލްސް ހޯދައިފިއެވެ. 

މި ރެކޯޑު ކުރިން އޮތީ ޓެނިސް ލެޖެންޑް، ރޮޖާރ ފެޑެރާރގެ އަތުގައެވެ. އޭނާ އެންމެ ފަހުން އޭޓީޕީ ޓުއަރއެއް ކާމިޔާބުކުރީ، 2019ގައި އުމުރުން 38 އަހަރާއި 2 މަހުގައެވެ. 

މޮންފިލްސް މި ރެކޯޑު އައުކޮށްފައި މިވަނީ އުމުރުން 38 އަހަރާއި 4 މަހުގައެވެ. އެހެންކަމުން މި މުބާރާތް 1990ގައި ފެށިފަށުން، މުބާރާތް ކާމިޔާބުކޮށްފައިވާ އެންމެ ދުވަސްވީ ކުޅުންތެރިއަކީ މިހާރު މޮންފިލްސްއެވެ.

އޭއެސްބީ ކްލެސިކްގެ ފައިނަލުގައި މޮންފިލްސް ކުޅުނީ ބެލްޖިއަމްގެ ޒިޒޫ ބާޖްސްއާ ދެކޮޅަށެވެ. އަދި އެ މެޗު 6-3 6-4 އިން ކާމިޔާބުކުރުމަށްފަހު އޭނާ މި ހާސިލްކުރީ ކެރިއަރުގެ 13 ވަނަ "ޓުރައ" ފެންވަރުގެ ތައްޓެވެ.

މި ކާމިޔާބަށްފަހު ވާހަކަ ދައްކަމުން މޮންފިލްސް ބުނީ، އުމުރަކީ ވަރަށް ބޮޑު ދައުރެއްއަދާކުރާ ކަމެއް ކަމަށާއި، އުމުރާ އެއްވަރަށް ކުޅުން ދެމެހެއްޓޭނީ ވަރަށް މަސައްކަތްކޮށްގެން ކަމަށެވެ. އަދި މި މުބާރަތުގައި އޭނާއަށް ދެއްކުނު ކުޅުމަށް އުފާކުރާކަމަށް ވެސް ފާހަގަކޮށްފައި ވެއެވެ.

ދުނިޔޭގެ 52 ވަނައަށް ރޭންކުކޮށްފައިވާ މޮންފިލްސް މި މުބާރާތަށްފަހު ދެން ދަތުރުކުރާނީ އޮސްޓްރޭލިއަން އޯޕަންގައި ވާދަކުރުމަށް، މެލްބަންއަށެވެ. އެ މުބާރާތް ފެށުމަށް ހަމަޖެހިފައިވަނީ މިއަދެވެ.