ޙައްޖު އެގްރީމެންޓްގައި ސޮއިކުރުމަށް ޑރ. ޝަހީމް ސަޢޫދީ ޢަރަބިއްޔާއަށް

ރާއްޖޭގެ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މިއަދު ސަޢޫދީ ޢަރަބިއްޔާއަށް ވަޑައިގަތުމަށްފަހު، އެ ޤައުމުގެ މިނިސްޓަރ އޮފް ޙައްޖު އެންޑް އުމްރާ ޑރ. ތައުފީޤު ރަބީޢާއާ ބައްދަލުކުރައްވައިފިއެވެ.

ޑރ. ޝަހީމް ސަޢޫދީ ޢަރަބިއްޔާއަށް ވަޑައިގެންފައިވަނީ ޑރ. ތައުފީޤު ރަބީޢާގެ ޚާއްޞަ ދަޢުވަތަކަށެވެ. މި ދަތުރުފުޅުގެ މައިގަނޑު މަޤްޞަދަކީ ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު ކޮންމެ އަހަރަކު ވެވޭ ޙައްޖު އެގްރީމެންޓްގައި ސޮއިކުރެއްވުމެވެ.

އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު ސަޢޫދީ ޢަރަބިއްޔާއަށް ވަޑައިގަންނަވައިފި. pic.twitter.com/ajpNFBZ3om

— Ministry of Islamic Affairs (@MVIaffairs) January 12, 2025

މި އެގްރީމެންޓަކީ ދިވެހި ޙައްޖު ޙާޖީންނަށް ބޭނުންވާ އެންމެހައި ޚިދުމަތްތަކާއި އެހީތެރިކަން ފޯރުކޮށްދިނުމަށް ދެ ޤައުމުގެ މެދުގައި ވެވޭ އެއްބަސްވުމެކެވެ. މީގެ ސަބަބުން ދިވެހި ޙާޖީންނަށް ފަސޭހަކަމާއެކު ޙައްޖުގެ އަޅުކަން އަދާކުރުމަށް މަގުފަހިވެގެންދާނެއެވެ.

ޑރ. ޝަހީމްގެ މި ދަތުރުފުޅުގައި ދެ ޤައުމުގެ މެދުގައި އޮތް އިސްލާމީ އަޚުއްވަތްތެރިކަން އިތުރަށް ބަދަހިވެ، ދީނީ ކަންކަމުގައި އެއްބާރުލުން އިތުރުވެގެންދާނެ ކަމަށް އުއްމީދު ކުރެވެއެވެ. އަދި މި ބައްދަލުވުމުގައި ދެ ޤައުމުގެ މެދުގައި ހިންގޭ އެހެނިހެން އިސްލާމީ ޕްރޮގްރާމްތަކާ ބެހޭގޮތުންވެސް މަޝްވަރާކުރެވޭނެ ކަމަށް ބެލެވެއެވެ.