އިތުރު ޚިދުމަތްތަކާއެކު "ވަންގަވް"ގެ އައު އެޕްލިކޭޝަން މިމަހު އިފްތިތާހްކުރަނީ

ޓްރޭޑްނެޓް ކޯޕަރޭޝަންގެ ޗެއަރމަން ސިޔާހް ޚަލީލް ވިދާޅުވެފައިވަނީ އިތުރު ޚިދުމަތްތަކާއެކު "ވަންގަވް"ގެ އައު އެޕްލިކޭޝަން މިމަހުގެ ތެރޭގައި އިފްތިތާހްކުރާނެ ކަމަށެވެ. މިކަން އޭނާ ހާމަކުރެއްވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.

"ވަންގަވް" އަކީ ސަރުކާރުގެ އެކި އިދާރާތަކުން ކުރިން ފޯރުކޮށްދެމުންދިޔަ ޚިދުމަތްތައް އެއް ތަނަކުން ލިބޭ ގޮތަށް ތަރައްޤީކޮށްފައިވާ ޑިޖިޓަލް ޕްލެޓްފޯމެކެވެ. މި ޒަމާނީ އަދި ފަސޭހަ ނިޒާމާއެކު، ސަރުކާރުގެ އެކި އޮފީސްތަކަށް އެކި ކަންކަމުގައި ދިއުމާއި އެކި ކަންކަމަށް އެދި ހުށަހެޅުން ވަނީ ނިމުމަކަށް އައިސްފައެވެ.

ސިޔާހް ޚަލީލް ވިދާޅުވި ގޮތުގައި، "ވަންގަވް ޓޫ ޕޮއިންޓް އޯ" ގެ ނަމުގައި އިފްތިތާހްކުރެވޭ މި އައު ވާޝަންގައި އޭއައި އިންޓަގްރޭޓެޑް، ބެހެޓަރ ޔޫއައި، އަދި އެހެނިހެން އައު ފީޗަރތައް ހިމެނޭނެއެވެ. މި އަޕްގްރޭޑާއެކު ޚިދުމަތް ލިބިގަންނަ ފަރާތްތަކަށް އިތުރު ފަސޭހަތަކެއް ލިބިގެންދާނެ ކަމަށް އޭނާ ފާހަގަކުރެއްވިއެވެ.

މިހާރުވެސް ވަންގަވް މެދުވެރިކޮށް 13 އެޖެންސީއަކުން 300 އަށްވުރެ ގިނަ ޚިދުމަތްތައް ދެމުންދާ ކަމަށާއި، ކުރިއަށް އޮތް ތަނުގައި މި ޚިދުމަތްތަކުގެ އަދަދު އިތުރުވެގެންދާނެ ކަމަށް ސިޔާހް ޚަލީލް ވިދާޅުވިއެވެ.

ވަންގަވްގެ މި އައު އެޕްލިކޭޝަން ތަޢާރަފުކުރުމާއެކު، ރައްޔިތުންނަށް ސަރުކާރުގެ ޚިދުމަތްތައް ލިބިގަތުމުގައި އިތުރު ފަސޭހަތަކެއް ލިބި، ޚިދުމަތްތައް އިތުރަށް ހަރުދަނާވެގެންދާނެ ކަމަށް ބެލެވެއެވެ.