ޚަބަރު
ދިވެހި ޙައްޖުވެރިންނަށް އިތުރު ފަސޭހަތައް ހޯދުމަށް ސަޢުދީއާއެކު މަޝްވަރާކުރައްވައިފި
ވަޒީރު ޑރ. މުޙައްމަދު ޝަހީމް ޢަލީ ސަޢީދު، ސަޢުދީ ޢަރަބިއްޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ފޮޓޯ:ވުޒާރާ
ދިވެހި ޙައްޖުވެރިންނަށް ސަޢުދީ ސަރުކާރުން ހަމަޖައްސާ އިންތިޒާމުތައް އިތުރަށް ހަރުދަނާކުރުމަށް ރާއްޖޭން ސަޢުދީ ޢަރަބިއްޔާއާއެކު މަޝްވަރާކުރައްވައިފިއެވެ. މި މަޝްވަރާތައް ކުރެވުނީ އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު، ސަޢުދީ ޢަރަބިއްޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ ޤައުމުގެ ޙައްޖާއި ޢުމްރާއާބެހޭ ވަޒީރު ޑރ. ތައުފީޤު ރަބީޢާއެކު ބޭއްވި ބައްދަލުވުމުގައެވެ.
މި ބައްދަލުވުމުގައި ޙައްޖާއި ޢުމްރާގެ ޚިދުމަތުގެ ފެންވަރު ރަނގަޅުކުރުމާއި، ދެ ޙަރަމްފުޅަށް ޚިދުމަތްކުރުމުގައި ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒު އަދި ވަލީ އަޙުދު މުޙައްމަދު ބިން ސަލްމާން ކުރައްވަމުން ގެންދަވާ މަސައްކަތްޕުޅުތަކަށް ވަޒީރު ޝަހީމް ޝުކުރު އަދާކުރެއްވިއެވެ. އަދި ދިވެހި ޙައްޖުވެރިންނަށް ދިމާވާ ދަތިތައް ޙައްލުކުރުމަށް ސަޢުދީގެ ޙައްޖާއި ޢުމްރާއާބެހޭ ވަޒީރު ކުރައްވަމުން ގެންދަވާ މަސައްކަތްތަކަށްވެސް ޝުކުރު އަދާކުރެއްވިއެވެ.
ވަޒީރު ޝަހީމް ވަނީ ސަޢުދީ ޢަރަބިއްޔާއާއެކު އޮންނަ އަޚުވަންތަ ގުޅުން އިތުރަށް ވަރުގަދަކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވަރަށް ބޮޑު އަހަންމިއްޔަތުކަމެއް ދެއްވާ ކަމެއްކަން ފާހަގަކުރައްވާފައެވެ. އަދި ސަޢުދީގެ ޙައްޖާއި ޢުމްރާއާބެހޭ ވަޒީރު ޑރ. ތައުފީޤު ރަބީޢާ ވަނީ ޙައްޖާގުޅޭ ކަންކަމަށް ދިވެހި ސަރުކާރުން ދެއްވާ އަހަންމިއްޔަތުކަން ފާހަގަކުރައްވައި، އެކަމަށް ޝުކުރު އަދާކުރައްވާފައެވެ.
މި ދަތުރުފުޅުގެ ތެރެއިން އިސްލާމީ ކަންތައްތަކާބެހޭ ވަޒީރު މިއަހަރުގެ ޙައްޖު އެގްރީމެންޓްގައި ސޮއިކުރައްވާނެ ކަމަށާއި، ސަޢުދީގައި އޮންނަ ޙައްޖު މައުރަޒުގައިވެސް ބައިވެރިވެވަޑައިގަންނަވާނެ ކަމަށް ވަނީ ހާމަކުރައްވާފައެވެ.
