އުމްރާއަށް ދިޔަ މީހެއްގެ ހާލު ދެރަވެ އައިސީޔޫގައި ފަރުވާ ދެނީ

އުމްރާގެ އަޅުކަން އަދާކުރުމަށް މައްކާއަށް ގޮސްހުރި ދިވެއްސެއްގެ ހާލު ދެރަވެގެން އެމީހާއަށް އައިސީޔޫގައި ފަރުވާދޭންފަށައިފިއެވެ.

އިސްލާމީ ކަންތައްތަކާބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދު  ސޯޝަލް މީޑިއާގައި ކުރެއްވެވި ޕޯސްޓެއްގައި ވިދާޅުވީ، ހާލު ގޯސްވެފައިވަނީ އުމުރުން 85 އަހަރުގެ މީހެއްގެ ކަމަށާއި އަދި އެމީހާއަށް މައްކާގެ ނޫރު ހޮސްޕިޓަލުގައި ފަރުވާ ދެމުން އަންނަ ކަމަށެވެ.

މިނިސްޓަރު އިތުރަށް ފާހަގަކުރެއްވެވި ގޮތުގައި، އެމީހާ ގެންދިޔަ އުމްރާ ގްރޫޕުން އެ މީހާގެ ކަންކަން ރަގަޅަށް ބަލަހައްޓަމުން އާދެއެވެ. އަދި މި ހާލަތާ ގުޅިގެން އެ މީހާގެ ދަރިއަކު މާދަމާ މައްކާއަށް ދިއުމަށް ހަމަޖެހިފައިވާކަމަށް ވެސް ފާހަގަކޮށްފައިވެއެވެ.

މީގެ އިތުރުން، އެ މީހާގެ ހާލަތު ކައިރިން ބަލަމުންދާނެކަމަށް ވެސް މިނިސްޓަރު ވަނީ ވިދާޅުވެފައެވެ.

މި ޚަބަރު ހިއްސާކުރެއްވިއިރު މިނިސްޓަރު ހުންނެވީ ސައުދީ އަރަބިއްޔާގައެވެ. އެ މަނިކުފާނުގެ މި ދަތުރުފުޅަކީ ދިވެހި ޙާޖީންނަށް ބޭނުންވާ އެންމެހައި ޚިދުމަތްތަކާއި އެހީތެރިކަން ފޯރުކޮށްދިނުމަށް ދެ ޤައުމުގެ މެދުގައި ވެވޭ އެއްބަސްވުމެއްގައި ސޮއިކުރައްވަން ވަޑައިގެންނެވި ދަތުރުފުޅެކެވެ.