މާދަމާއިން ފެށިގެން ކުރިއަށް އޮތް ހަ ދުވަހަށް މޫސުން ގޯސްވާނެ: މޫސުމާ ބެހޭ އިދާރާ

މާދަމާއިން ފެށިގެން ކުރިޔަށް އޮތް ހަ ދުވަހަށް މޫސުން ގޮސްވާނެކަމަށް، މޯލްޑިވްސް މީޓިއޮރޮލޮގިކަލް ސާރވިސްއިން ލަފާކޮށްފިއެވެ. 

ރާއްޖޭގެ މޫސުމާ ބެހޭ ޤައުމީ އިދާރާއިން ހާމަކޮށްފައިވާ ގޮތުގައި، ބޭ އޮފް ބެންގާލްގައި އުފެދިފައިވާ ކޮޅިގަނޑެއް ހުޅަނގަށް ޖެހުމާ ގުޅިގެން، އެ ކޮޅިގަނޑުގެ އަސަރު މާދަމާއިން ފެށިގެން ރާއްޖެއަށް ކުރަންފަށާނެއެވެ.

މި ކޮޅިގަނޑުގެ ސަބަބުން އާންމު ގޮތެއްގައި ވައި ގަދަވެ، ކަނޑުތައް ވެސް ގަދަވާނެ ކަމަށާއި އަދި އުތުރާއި މެދުރާއްޖެތެރޭގެ ބައެއްރަށްތަކަށް އުދައިގެ އަސަރު ކުރާނެކަމަށް ވެސް މޫސުމާ ބެހޭ ޤައުމީ  އިދާރާއިން ލަފާކޮށްފައިވެއެވެ.

މިދިޔަ ހަފްތާގައި ވެސް ރާއްޖެއަށް ވަނީ ގަދަޔަށް ވިއްސާރަކޮށްފައެވެ. އެގޮތުން، މާލެ އާއި އަތޮޅު ތެރޭގެ ބައެއް ރަށްރަށުގައި ވެސް ފެންބޮޑުވެ، ސަލާމަތީ ބާރުތަކުން ހަރަކާތްތެރިވެފައިވެއެވެ. 

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފައިވާ ގޮތުގައި، މިފަހުން މާލެއަށް ކުރި ވިއްސާރައިގައި ލިބުނު ގެއްލުންތައް، މީގެ ކުރީ ފަހަރުތަކަށް ވުރެން ބޮޑެވެ. އެގޮތުން މިފަހަރު ލިބުނު ގެއްލުން 2.2 މިލިއަން ރުފިޔާއަށް އަރާ ކަމަށް ހާމަކޮށްފައިވެއެވެ.