Ads by Exprox

ޚަބަރު

ހައި ކޯޓުން ދޫކޮށްލި ޑްރަގް މައްސަލައިގައި ހިމެނޭ ދެ މީހުން އަނެއްކާ ހައްޔަރުކޮށްފި

ހައި ކޯޓުން ދޫކޮށްލި ޑްރަގް މައްސަލައިގައި ހިމެނޭ ދެ މީހުން އަނެއްކާ ހައްޔަރުކޮށްފި

މަސްތުވާތަކެތި ވިއްކައި މަނީ ލޯންޑާކުރާކަމުގެ ތުހުމަތުގައި ހައްޔަރުކުރި ނިއުޝާދާއި އާޒިމް،

މިފްތާޙް މުޙައްމަދު

މިފްތާޙް މުޙައްމަދު

13 ޖެނުއަރީ 2025، 10:43

13 ޖެނުއަރީ 2025، 10:43

ހުލާސާ

ކްރިމިނަލް ކޯޓުން ކުރި އަމުރުގައި ބުނީ، ފުވައްމުލައް ކޯޓުގެ އަމުރު ހައި ކޯޓުން ބާތިލްކޮށްފައި ވިޔަސް، އާ އަމުރެއްގެ ދަށުން އެ މީހުން ހައްޔަރުކުރަން ހުރަހެއް އޮތް ކަމަށް ނުފެންނަ ކަމަށް.

މަސްތުވާތަކެއްޗާ ދެކޮޅަށް ފުވައްމުލަކުގައި ކުރަމުންދާ މަސައްކަތުގެ ތެރެއިން، މަސްތުވާތަކެތި ވިއްކައި މަނީ ލޯންޑާކުރުމުގައި އިސްކޮށް އުޅޭ ކަމުގެ ތުހުމަތުގައި ހައްޔަރުކުރި ދެ މީހަކު ހައި ކޯޓުން ދޫކޮށްލުމުން، ފުވައްމުލަކު ކޯޓުގެ އަމުރެއްގެ ދަށުން އެ ދެ މީހުން އަނެއްކާ ވެސް ހައްޔަރުކޮށްފިއެވެ.

މި މައްސަލައިގައި ހިމެނޭ ފުވައްމުލަކު ދޫޑިގަން، ކަރަންކާވިލާ އަހުމަދު ނިއުޝާދު، 34، އާއި ދޫޑިގަން، ޒަމާނީވިލާ، ހަސަން އާޒިމް، 29، ހައްޔަރުކޮށްފައިވަނީ މިދިޔަ މަހުގެ 9ވަނަ ދުވަހުއެވެ. ހައްޔަރުކުރުމަށްފަހު ފުވައްމުލަކު މެޖިސްޓްރޭޓް ކޯޓުން ނިންމީ ޝަރީޢަތް ނިމެންދެން އެ ދެ މީހުން ބަންދުގައި ބޭތިއްބުމަށެވެ.

ނަމަވެސް، ތުހުމަތުކުރެވޭ މީހުންގެ ފަރާތުން އެ އަމުރު ހައި ކޯޓުގައި އިސްތިއުނާފުކުރުމުން އެ ކޯޓުން ކުރި ހުކުމްގައި ބުނީ، ތުހުމަތު ކުރެވޭ މައްސަލައިގައި އެކަށީގެންވާ މިންވަރަށް ހެކި ހުރިކަމަށް ނުބެލެވޭތީ، އެ ދެ މީހުން ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށާއި، އެހެންކަމުން އެ ކޯޓުން އެ މީހުން ބަންދުން ދޫކޮށްލަން ނިންމާފައިވާކަމަށެވެ.

އެހެންކަމުން އާދީއްތަ ދުވަހު ފުވައްމުލަކު ކޯޓުން ނެރުނު އިތުރު އަމުރަކާއެކު ނިއުޝާދު އާއި އާޒިމް ވަނީ އަނެއްކާ ވެސް ހައްޔަރުކޮށްފައެވެ. އަދި އެ ދެ މީހުން މާލެއިން ހައްޔަރުކުރުމަށްފަހު އާޒިމްގެ ބަންދަށް 7 ދުވަސް އަދި ނިއުޝާދުގެ ބަންދަށް 10 ދުވަސް ކްރިމިނަލް ކޯޓުން ވަނީ ޖަހާފައެވެ.

މި ދެ މީހުން ބަންދުގައި ބޭތިއްބުމަށް ކްރިމިނަލް ކޯޓުން ކުރި އަމުރުގައި ބުނީ، ފުވައްމުލައް ކޯޓުގެ އަމުރު ހައި ކޯޓުން ބާތިލްކޮށްފައި ވިޔަސް، އާ އަމުރެއްގެ ދަށުން އެ މީހުން ހައްޔަރުކުރަން ހުރަހެއް އޮތް ކަމަށް ނުފެންނަ ކަމަށެވެ. 

އާޒިމްގެ މައްޗަށް މަސްތުވާތަކެތި ވިއްކުމާއި މަނީ ލޯންޑަރިންއަށް ތުހުމަތުކޮށްފައިވަނީ، އޭނާއަކީ ދާއިމީކޮށް ވަޒީފާގައި އުޅުނު މީހެއްކަމަށް އެނގެން ނެތި، އޭނާގެ އެކައުންޓުން 5 މިލިއަން ރުފިޔާ ދައުރުކޮށްފައިވުމެވެ. އަދި މިފައިސާ އެހެން މީހުންނަށް ފޯރުކޮށްދިންކަމަށް ވެސް ފުލުހުން ބުނާކަމަށް ކޯޓު އަމުރުގައި އޮތެވެ.

މީގެ އިތުރުން ނިއުޝާދުގެ އެކައުންޓުން 5 އަހަރު ތެރޭގައި 21 މިލިއަން ރުފިޔާ ދައުރުކޮށްފައިވާއިރު، އޭނާ އަކީ ވެސް ވަޒީފާގައި އުޅުނު މީހެއްކަން އެނގެން ނެތްކަމަށް ފުލުހުން ވަނީ ހާމަކޮށްފައިވާކަމަށް ކޯޓު އަމުރުގައި ވެއެވެ.

މި ލިޔުން ކިޔާލުމުން

Ads by MSS