ޚަބަރު
ވިއްސާރައިގެ ނުރައްކަލުން ސަލާމަތްވުމަށް މާލޭގެ 50 އަށްވުރެ ގިނަ ގޭބިސީގައި ވެލި ބަސްތާ ޖަހައިފި

މާލޭ ސިޓީ ކައުންސިލުން ވެލިބަސްތާ ތައްޔާރުކުރަނީ ފޮޓޯ:ސިޓީ ކައުންސިލް
މި ދުވަސްވަރު ރާއްޖޭގެ އެކި ހިސާބުތަކަށް ކުރަމުންދާ ވިއްސާރައާ ގުޅިގެން މާލޭގެ 50 އަށްވުރެ ގިނަ ގޭބިސީތަކުގައި ވެލި ބަސްތާ ޖަހައިފިއެވެ. މިއީ މޫސުމާބެހޭ ޤައުމީ އިދާރާއިން މިއަދުން ފެށިގެން ރާއްޖެއަށް ވިއްސާރަކުރާނެ ކަމަށް އިންޒާރު ދިނުމާ ގުޅިގެން ކަމާ ބެހޭ އިދާރާތަކާއި އާންމުން ގުޅިގެން އަޅަމުންދާ ރައްކާތެރިކަމުގެ ފިޔަވަޅުތަކުގެ ތެރެއިން އެއް ފިޔަވަޅެވެ.
ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މަޢުލޫމާތު ދެއްވިގޮތުގައި، ބޯކޮށް ވާރޭވެހި، މާލޭގައި ފެން ބޮޑުވެއްޖެނަމަ އޭގެ އަސަރުކުރާނެ ކަމަށް ލަފާކުރެވޭ 56 ގޭބިސީއެއްގައި ވެލި ބަސްތާ ޖަހާފައިވެއެވެ. މި މަސައްކަތް ކުރިއަށް ގެންގޮސްފައިވަނީ މާލެ ސިޓީ ކައުންސިލުންނެވެ.
މާލެ ސިޓީ ކައުންސިލުން މަޢުލޫމާތު ދެއްވިގޮތުގައި، ވެލި ބަސްތާ ޖެހުމުގެ މަސައްކަތް ފެށިފައިވަނީ އިއްޔެއެވެ. އަދި ފެން ވަންނާނެކަމަށް ލަފާކުރެވޭ ގޭބިސީތަކުގައި މިއަދުވެސް ވެލި ބަސްތާ ޖެހުމުގެ މަސައްކަތް ކުރިއަށް ގެންދާނެ ކަމަށް ވިދާޅުވިއެވެ.
މީގެ އިތުރުން، ދިވެހިރާއްޖޭގެ ޤައުމީ ދިފާޢީ ބާރުންވެސް ދަނީ ފެން ހިންދުމަށްޓަކައި ދުރާލާ ތައްޔާރުވަމުންނެވެ. ވެސްޓްޕާކް ސަރަހައްދުގައިހުރި ޕަންޕު ބޭނުންކޮށްގެން ފެން ހިންދުމުގެ މަސައްކަތް ދިފާޢީ ބާރުން މިހާރުވެސް ދަނީ ކުރަމުންނެވެ.
މޫސުމާބެހޭ ޤައުމީ އިދާރާއިން ދެއްވި މަޢުލޫމާތުގައިވާ ގޮތުން، ރާއްޖޭގެ އިރުން ހުޅަނގު ދެކުނުން، ބޭ އޮފް ބެންގާލްގައި އުފެދިފައިވާ ކޮޅިގަނޑު މިހާރު ރާއްޖޭގެ ހުޅަނގަށް ޖެހި ރާއްޖެއާ ގާތަށް ޖެހެމުންދެއެވެ. މިއަދުގެ ވަގުތުތަކުގައި ރާއްޖެއަށް ކެރީގެ އަސަރު ކުރާނެ ކަމަށާއި، ދަންވަރާއި ފަތިހު ބޯކޮށް ވާރޭ ވެހޭނެކަމަށް ލަފާކުރެވެއެވެ. އަދި ބައެއް ރަށްރަށަށް އުދަ އަރައި، ބޯކޮށް ވާރޭ ވެހުމުގެ ސަބަބުން ފެން ބޮޑުވެދާނެކަމަށްވެސް އިންޒާރު ދެއްވާފައިވެއެވެ.