ޚަބަރު
މޫސުންގޯސްވާނެކަމަށް ލަފާކޮށް ރައްޔިތުންނަށް އެހީތެރިވާން ފުލުހުން 24 ގަޑިއިރު ހަރަކާތްތެރިވަނީ

ފުލުހުން ވެލިބަސްތާ ޖަހަން އެހީތެރިވަނީ ފޮޓޯ: އެމްއެންޑީއެފް
ކުރިއަށް އޮތް ދުވަސްތަކުގައި ވިއްސާރަވެ، ފެންބޮޑުވުމުގެ ނުރައްކާ އޮތްކަމަށް މޫސުމާބެހޭ އިދާރާއިން އިންޒާރު ދީފައިވާތީ، ދިވެހި ފުލުހުންގެ ޚިދުމަތުން ވަނީ 24 ގަޑިއިރު ހަރަކާތްތެރިވުމަށް ޙާއްސަ އޮޕަރޭޝަނެއް ފަށާފައެވެ.
މިއަދު ބޭއްވުނު ނޫސްވެރިންގެ ބައްދަލުވުމެއްގައި ފުލުހުން މި މަޢުލޫމާތު ހާމަކުރިއެވެ. އެގޮތުން، ފުލުހުންގެ ޓީމްތައް އާންމުކޮށް ފެންބޮޑުވާ ސަރަހައްދުތަކުގައި ހަރަކާތްތެރިވާނެކަމަށް ވިދާޅުވިއެވެ. އަދި މޫސުމީ އެމަރޖެންސީ އޮޕަރޭޝަންސް އެކްޓިވޭޓް ކުރެވިފައިވާކަމަށްވެސް ފުލުހުން ވަނީ ހާމަކޮށްފައެވެ.
ފެންބޮޑުވުމުގެ ނުރައްކަލުން ރައްކާތެރިވުމަށް އެކިއެކި ފަރާތްތައް ތައްޔާރުކުރުމަށް، އެމަރޖެންސީ ރެސްޕޮންސްގެ ގޮތުގައި ވެލިބަސްތާ ޖެހުމަށް ގޯނި ފޯރުކޮށްދެވިފައިވާކަމަށް ފުލުހުން ބުނެފައިވެއެވެ. މިގޮތުން، ސިޓީ ކައުންސިލުން ރެއިން ފެށިގެން އާންމުކޮށް ގެއްލުން ލިބޭ 57 އަށްވުރެ ގިނަ ތަނެއްގައި ވެލިބަސްތާ ޖަހާފައިވާކަމަށާއި، މި މަސައްކަތް މިއަދުގެ އެކި ވަގުތުތަކުގައި ކުރިއަށްދާނެކަމަށް ފުލުހުން ބުނެފައިވެއެވެ.
އިއްޔެ ރިލީޒްކޮށްފައިވާ އެޑްވައިޒަރީގައިވާ ކަންކަމަށް ސަމާލުވެ، ފަރުދީ ފެންވަރުގައްޔާއި އަތޮޅު އަދި ކައުންސިލް ފެންވަރުގައި އަމަލުތައް ބެހެއްޓުމަށާއި، އިރުޝާދުތަކަށް ތަބާވެ އެހީތެރިކަމާއި އެއްބާރުލުން ދިނުމަށް ފުލުހުން އާންމުންނަށް ގޮވާލައްވާފައިވެއެވެ.
މީގެ އިތުރުން، ކުރިން ޖަހާފައިވާ ވެލިބަސްތާތައް ބޭނުންކޮށްގެން ގެއަށް ފެން ނުވަންނާނެހެން ބެހެއްޓުމަށާއި، ފެންބޮޑުެފައިވާ ސަރަޙައްދުގައި ބަރު އުޅަނދު ނުދުއްވުމަށް ފުލުހުން އިރުޝާދު ދީފައިވެއެވެ. ސައިކަލް ފަދަ ތަކެތި އާންމުކޮށް ފެންބޮޑުވާ ހިސާބުތަކުގައި ޕާކް ކޮށްފައި ނުބަހައްޓާ ރައްކާތެރި ހިސާބުގައި ގެއްލުން ނުލިބޭނެ ގޮތަށް ބެހެއްޓުމަށްވެސް ވަނީ އިރުޝާދުދެއްވާފައެވެ.
ފުލުހުން އަދި އިތުރަށް އާންމުންނަށް އިރުޝާދު ދެމުން ބުނެފައިވަނީ، ކުދި ވިޔަފާރިތަކާއި، ރެސްޓޯރަންޓްތަކާއި، ގުދަންތަކާއި މިނޫންވެސް ތަންތަނުގައި ހުރި އަގުބޮޑު މުދަލުގައި ފެންޖެހިދާނެކަމަށް ވެރިފަރާތްތަކުން ސަމާލުވުމަށްވެސް ފުލުހުން ވަނީ އިރުޝާދު ދެއްވާފައެވެ.
މި ޚާއްޞަ ހާލަތާ ގުޅިގެން، ރައީސް މުޢިއްޒުގެ އިރުޝާދުގެ ދަށުން ޚާއްޞަ ޓާސްކް ފޯހެއް އެކުލަވާލެވިފައި ވާކަމަށްވެސް ފުލުހުން ވަނީ ހާމަކޮށްފައެވެ. މި ޓާސްކް ފޯހުގެ މަސައްކަތަކީ ވިއްސާރައާ ގުޅިގެން ދިމާވެދާނެ ކުއްލި ހާލަތްތަކަށް އަވަސް އަދި ހަރުދަނާ ފިޔަވަޅުތައް އެޅުމެވެ.
ފުލުހުންގެ ޚިދުމަތުން އާންމުންނަށް އިލްތިމާސްކުރަނީ، މޫސުމާބެހޭ އިދާރާއިންނާއި ސަރުކާރުގެ ކަމާބެހޭ އިދާރާތަކުން ދޭ އިރުޝާދުތަކަށް ފުރިހަމައަށް ތަބާވުމަށެވެ. އަދި އެއްވެސް ކަހަލަ ކުއްލި ހާލަތެއް ދިމާވެއްޖެނަމަ، ލަސްނުކޮށް ފުލުހުންގެ ހޮޓްލައިން ނަންބަރު 119 އަށް ގުޅުމަށެވެ.