ޚަބަރު
މިދިޔަ އަހަރު 15،000 އަށްވުރެ ގިނަ އުޅަނދު ޓޯކޮށްފި

ނުގަވާއިދުން ހުންނަ އުޅަނދު ޓޯއު ކުރަނީ ފޮޓޯ؛ އެޑިޝަން
މިދިޔަ އަހަރު ދިވެހި ފުލުހުންގެ ޚިދުމަތުން ހިންގި އޮޕަރޭޝަންތަކުގައި 15،000 އަށްވުރެ ގިނަ އުޅަނދު ޓޯކޮށްފައިވާ ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.
ފުލުހުން މިއަދު އާންމުކުރި 2024 ވަނަ އަހަރުގެ ޓްރެފިކް އަދި ޓޯވިންގ ތަފާސްހިސާބުތަކުން ދައްކާގޮތުގައި މިދިޔަ އަހަރު ޖުމްލަ 15،514 އުޅަނދު ޓޯ ކޮށްފައިވެއެވެ. މީގެ ތެރޭގައި 11،645 ސައިކަލާއި، 2،567 ކާރާއި 478 ޕިކަޕާއި 369 ވޭން އަދި 87 ޓްރަކު ހިމެނެއެވެ.
ފުލުހުން ވިދާޅުވީ މިދިޔަ އަހަރު ޓޯ ކުރި އުޅަނދުތަކުގެ ތެރެއިން 546 އުޅަނދެއް ނައްތާލާފައިވާކަމަށެވެ. އަދި 13،562 އުޅަނދު ވެރިފަރާތާ ހަވާލުކޮށްފައިވާކަމަށެވެ.
މިދިޔަ އަހަރު މަގުތަކުގައި ފުލުހުން ހިންގެވި އޮޕަރޭޝަންތަކުގައި ޖުމްލަ 73،953 އުޅަނދެއް ވަނީ ޗެކްކޮށްފައެވެ. މި އުޅަނދުތަކުގެ ތެރެއިން، 7،606 އުޅަނދަކާމެދު ފިޔަވަޅު އަޅާފައިވާކަމަށް ތަފާސްހިސާބުން ދައްކައެވެ.
ފުލުހުން ވިދާޅުވީ އުޅަނދުތައް ހުއްޓުވައި، 66،347 މީހަކަށް ނަސޭހަތް ދީފައިވާއިރު، 7،606 މީހަކަށް ޓްރެފިކް ވަޔަލޭޝަން ސްލިޕް ދޫކޮށްފައިވާ ކަމަށެވެ. އަދި މި އޮޕަރޭޝަންތަކުގައި ލައިސަންސް ނެތި ދުއްވި 2،138 މީހަކު ފާހަގަކުރެވުނު ކަމަށާއި މީގެ ތެރޭގައި ދެފުރޮޅުލީ 2،005 އުޅަނދާއި ހަތަރު ފުރޮޅުލީ 133 އުޅަނދު ހިމެނޭ ކަމަށް ފުލުހުން ވިދާޅުވެއެވެ.
މީގެ އިތުރުން ނުރައްކާތެރިކޮށް ދުއްވުމުގެ 293 މައްސަލަ މިދިޔަ އަހަރު ފާހަގަކުރެވިފައިވާ ކަމަށް ފުލުހުން ވިދާޅުވެއެވެ. އޭގެތެރޭގައި ދެފުރޮޅުލީ 271 އުޅަނދާއި ހަތަރު ފުރޮޅުލީ 22 އުޅަނދު ދުއްވުމުގެ މައްސަލަތައް ހިމެނެއެވެ.
ފުލުހުން ވިދާޅުވީ މަގުމަތީގެ ނުރައްކާތެރި އެކްސިޑެންޓުތައް ހިނގުމަކީ އެ ޚިދުމަތުން ނުހަނު ކަންބޮޑުވާ ކަމެއް ކަމަށާއި އެކްސިޑެންޓުތައް މަދުކުރުމަށް ގިނަ ވަސީލަތްތަކެއް ބޭނުންކޮށްގެން ހަރުދަނާ މަސައްކަތްތަކެއް ފާއިތުވި އަހަރު ކޮށްފައިވާ ކަމަށެވެ.
ދިވެހި ފުލުހުންގެ ޚިދުމަތުގެ އަމާޒަކީ މަގުމަތީގެ ސަލާމަތާއި ރައްކާތެރިކަމަށް އާންމުންގެ ހޭލުންތެރިކަން އިތުރުވެ، ޓްރެފިކް ގަވާއިދުތަކަށް ހުރުމަތްތެރިކޮށް ހިތާ ރައްޔިތަކު އުފެދިގެން ދިއުންކަން ފުލުހުން ފާހަގަކުރައްވައެވެ. އަދި މަގުމަތީގެ ރައްކާތެރިކަން ކަށަވަރުކުރުމަށް އާންމުންގެ އެއްބާރުލުން ވަރަށް މުހިންމު ކަމަށްވެސް ވިދާޅުވެއެވެ.