Ads by Exprox

ޚަބަރު

ފެން ހިންދުމަށްޓަކައި ބޭނުންކުރާ ޕަންޕު 72 ރަށަކަށް ފޯރުކޮށްދީފި

ފެން ހިންދުމަށްޓަކައި ބޭނުންކުރާ ޕަންޕު 72 ރަށަކަށް ފޯރުކޮށްދީފި

މާލޭގައި ފެންބޮޑުވުމާ ގުޅިގެން ޕަންޕު ބޭނުންކޮށްގެން ފެންގަނޑު ހިންދުމުގެ މަސައްކަތް ކުރަނީ، ފޮޓޯ: އެމްއެންޑީއެފް

މިފްތާޙް މުޙައްމަދު

މިފްތާޙް މުޙައްމަދު

13 ޖެނުއަރީ 2025، 02:53

13 ޖެނުއަރީ 2025، 02:53

ހުލާސާ

އަތޮޅުތެރޭގައި ފެންބޮޑުވާ ހާލަތްތްތަކުގައި އެންމެ ފުރަތަމަ އެހީތެރިކަން ދޭނީ ރަށްރަށުގައި ގާއިމުކޮށްފައިވާ ކޮމިއުނިޓީ އިމަޖެންސީ ރެސްޕޮންސް ޓީމުތަކުން.

މިއަދުން ފެށިގެން ކުރިޔަށް އޮތް ހަ ދުވަހަށް މޫސުން ގޯސްވާނެކަމަށް، މޫސުމާ ބެހޭ ޤައުމީ އިދާރާއިން ލަފާކޮށްފައިވާއިރު، ވިއްސާރައިގެ ސަބަބުން ލިބިދާނެ ގެއްލުންތައް ކުޑަކުރުމުގެ ގޮތުން ކުރަމުންދާ މަސައްކަތްތަކުގެ ތެރެއިން، މިހާތަނަށް 72 ރަށަކަށް ފެން ހިންދާ ޕަންޕު ފޯރުކޮށްދީފައިވާނެކަމަށް، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.

އެކަން ހާމަކޮށްފައިވަނީ އެންޑީއެމްއޭއާއި ފުލުހުންނާއި ޑިފެންސް ފޯސް ގުޅިގެން، ކަމާގުޅުންހުރި އިދާރާތަކުން މިކަމަށް ވަމުންދާ ތައްޔާރީތައް ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި އެންޑީއެމްއޭގެ ސީއީއޯ ހިސާން ހަސަންއެވެ. ހިސާން ވިދާޅުވީ ފެން ބޮޑުވުމުގެ ހާލާތަކަށް ތައްޔާރުވުމަށް އާންމުކޮށް ފެންބޮޑުވާ ރަށްތަކަށް ވަސީލަތްތައް ފޯރުކޮށްދީފައިވާ ކަމަށެވެ.

އަޅުގަނޑުމެން މިހާރު ވެސް ވާނީ އާންމުކޮށް ފެންބޮޑުވާ 72 ރަށަކަށް ފެން ހިންދާ ޕަންޕާއި އެއާ ގުޅޭ ވަސީލަތްތައް ފޯރުކޮށްދީފައި. މީގެއިތުރުން، ފިކްސްޑް ބޭސްޑް ފެން ހިންދާ ނިޒާމުތައް ވެސް ރަށްރަށުގައި ގާއިމުކޮށްފައި ހުންނާނެ.

އެންޑީއެމްއޭގެ ސީއީއޯ ހިސާން ހަސަން ވިދާޅުވިއެވެ.

އެމެޖެންސީ ހާލާތްތަކުގައި މަސައްކަތްތައް ރޭވިފައިވާގޮތް ހިއްސާކުރައްވަމުން ހިސާން ވިދާޅުވީ، އަތޮޅުތެރޭގައި ފެންބޮޑުވާ ހާލަތްތްތަކުގައި އެންމެ ފުރަތަމަ އެހީތެރިކަން ދޭނީ ރަށްރަށުގައި ގާއިމުކޮށްފައިވާ ކޮމިއުނިޓީ އިމަޖެންސީ ރެސްޕޮންސް ޓީމުތަކުން ކަމަށާއި، އެ ޓީމުތަކަށް ފެން ނުހިންދޭ ވަރަށް ބޮޑުވެއްޖެ ނަމަ، ފުލުހުންނާއި ސިފައިންގެ އިތުރުން އެހެނިހެން އިދާރާތަކުން އެ ޓީމުތަކަށް އެހީތެރިކަން ދޭނެކަމަށެވެ.

މިއީ މިފަދަ ހާލަތްތަކުގައި ކުރިން ވެސް އަމަލުކުރަމުން އައިގޮތްކަމަށް ވެސް ހިސާން ފާހަގަކޮށްފައިވެއެވެ. 

އެންޑީއެމްއޭ އިން މިދިޔަ ހަފްތާގައި ހާމަކޮށްފައިވާ ގޮތުގައި، މިފަހުން މާލެއަށް ކުރި ވިއްސާރައިގައި ލިބުނު ގެއްލުންތައް، މީގެ ކުރީ ފަހަރުތަކަށް ވުރެން ބޮޑެވެ. އެގޮތުން މިފަހަރު ލިބުނު ގެއްލުން 2.2 މިލިއަން ރުފިޔާއަށް އަރާ ކަމަށް ހާމަކޮށްފައިވެއެވެ.

މި ލިޔުން ކިޔާލުމުން

Ads by MSS