ޚަބަރު
މިއަދުވެސް ރާއްޖޭގެ ބައެއް ރަށްތަކަށް ގުގުރުމާއެކު ބޯކޮށް ވާރޭވެހޭނެކަމަށް ލަފާކޮށްފި

ރާއްޖެއަށް ވިއްސާރަ ދުވަހެއް ފޮޓޯ: ސަން އޮންލައިން
ކުރިއަށް އޮތް 24 ގަޑިއިރު ތެރޭގައި ރާއްޖޭގެ ބައެއް ރަށްތަކަށް ގުގުރުމާއެކު ބޯކޮށް ވާރޭވެހުމުގެ ފުރުސަތު އޮތްކަމަށް މޫސުމާބެހޭ ޤައުމީ އިދާރާއިން އިންޒާރު ދީފިއެވެ.
މޫސުމާބެހޭ ޤައުމީ އިދާރާއިން ހާމަކުރެއްވިގޮތުގައި ކުރިއަށް އޮތް 24 ގަޑިއިރު ތެރޭގައި ރާއްޖޭގެ ހުރިހާ ސަރަޙައްދަކަށްވެސް ވިއްސާރަވެ، ބައެއް ރަށްތަކަށް ގުގުރުމާއެކު ބޯކޮށް ވާރޭވެހުމުގެ ފުރުސަތު އޮތްކަމަށެވެ.
މި އިދާރާއިން އިތުރަށް ހާމަކުރި ގޮތުގައި، އުތުރުގެ އަތޮޅުތަކަށް 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ އިރު، ދެކުނާއި މެދުރާއްޖެތެރެއަށް 10 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެއެވެ. އަދި ކަނޑުތައް އުތުރުގައި އާދައިގެ މިންވަރަކަށް މަޑުވެފައި، އެހެން ސަރަޙައްދުތަކުގައި އާދައިގެ މިންވަރަކަށް ކަނޑު ގަދަވާނެ ކަމަށްވެސް އެ އިދާރާއިން ބުންޏެވެ.
މި ވަގުތު ރާއްޖޭގެ މޫސުން ގޯސްވެފައިވަނީ ރާއްޖެއާ ކައިރި ސަރަޙައްދެއްގައި އުފެދިފައިވާ ކޮޅިގަނޑެއްގެ ސަބަބުން ކަމަށް މޫސުމާބެހޭ ޤައުމީ އިދާރާއިން ހާމަކުރިއެވެ. މި ކޮޅިގަނޑާ ގުޅުންހުރި ވިއްސާރަ ވިލާތައް ރާއްޖޭގެ ސަރަޙައްދަށް މަޑުމަޑުން މިހާރު އަރަމުންދާ ކަމަށްވެސް އެ އިދާރާއިން ބުންޏެވެ.
އިއްޔެވެސް ރާއްޖޭގެ އެކި ސަރަޙައްދުތަކަށް ވަނީ ބޯކޮށް ވާރޭވެހިފައެވެ. މިދިޔަ 24 ގަޑިއިރު ތެރޭގައި އެންމެ ގިނައިން ވާރޭވެހުނީ ލ. މާވަށަށް ކަމަށްވާއިރު، އެއީ 37.5 މިލިމީޓަރުގެ ވާރޭއެކެވެ. ދެވަނައަށް އެންމެ ގިނައިން ވެހުނީ ލ. ކައްދޫއަށް ކަމަށްވާއިރު، އެއީ 28ރު، އެއީ 28.6 މިލިމީޓަރުގެ ވާރޭއެކެވެ. މާލެއަށް ވެހުނީ 8.3 މިލިމީޓަރުގެ ވާރޭއެވެ.
މޫސުމާބެހޭ ޤައުމީ އިދާރާއިން އަންގާފައިވާ ގޮތުގައި މި މަހުގެ 18 ވަނަ ދުވަހާ ހަމައަށް ރާއްޖޭގެ މޫސުން ގޯސްކޮށް ހުންނާނެއެވެ. ވީމާ، މި މުއްދަތުގައި ދަތުރުފަތުރު ކުރާއިރު ފަރުވާތެރިވުމަށް އާންމުންނަށް އިލްތިމާސްކޮށްފައިވެއެވެ.